(AP) — Elon Musk abruptamente a cancela ‘The Don Lemon Show’ riba su red social X despues cu e ex-presentador di CNN a graba un entrevista cu e biyonario pa su prome episodio, cu ainda no a sali.
Musk ta doño di X, anteriormente conoci como Twitter, y frecuentemente ta proclama su mes un ‘absolutista di libertad di expresion’. Den un post riba X, e compania basa na San Francisco a bisa cu despues di consideracion cauteloso, a “dicidi pa no drenta den un asociacion comercial cu e show.” A agrega cu show di Lemon “ta bon bini pa publica su contenido riba X, sin censura, ya cu nos ta kere den provee un plataforma pa creadornan eleva nan trabao y conecta cu comunidadnan nobo.”
Den un video riba X, Lemon a declara cu “Elon Musk ta rabia cu mi” y a bisa cu e ta bay publica su entrevista cu e CEO di Tesla riba YouTube y a traves di su podcast dialuna.
Lemon no a bay den specifico tocante e fuente di e supuesto infelicidad di Musk, pero a skirbi: “A traves di nos combersacion, mi a keda reitera na dje cu maske e tabata tenso na algun momento, mi ta kere ta bon pa hende mira y scucha nos intercambio y cu nan lo siña di nos combersacion.”
“Pero aparentemente, absolutismo den libertad di expresion no ta aplica ora ta trata di pregunta tocante su persona for di hende manera ami,” el a agrega.
Den un discusion cu Lemon despues dialuna riba CNN, presentador Erin Burnett a mustra clip di e entrevista cu Musk, den cual e CEO di SpaceX a bira incomodo ora a puntr’e tocante moderacion di contenido y e plamamento di lenguahe odioso riba X.
Den e clip, Lemon a puntra Musk si e ta kere cu e y su plataforma social tin algun responsabilidad pa modera lenguahe odioso riba X. El a destaca e plamamento di e “Gran Teoria di Reemplaso,” un creencia racista cu den su forma mas extremo, ta bisa cu Hudiunan ta tras di un plan pa disminui influencia di hende blanco na Merca.
Musk a contesta skerpi cu e no mester contesta pregunta di reporteronan. “E unico motibo cu mi ta den e entrevista aki ta pasobra bo ta riba e plataforma X y bo a pidi pa esaki,” el a bisa. “De lo contrario, mi no lo ta haciendo e entrevista aki.” Ora Lemon a sigui cu un pregunta tocante critica riba Musk pa e asunto aki, Musk a contesta, “mi ta ricibi critica constantemente. Mi no ta worry.”
Na januari, X a anuncia un “partnership nobo di contenido” cu Lemon pa e show, bisando cu lo post episodionan di 30 minuut tres biaha pa dia riba temanan incluyendo politica, cultura, deporte y entretenimento. E acuerdo aki tabata parti di e esfuersonan di e plataforma pa reforsa su oferta di contenido y atrae aviso. X tambe a anuncia shownan presenta pa ex-Congresista, Tulsi Gabbard y locutor di radio, Jim Rome.
Lemon a haya retiro di CNN aña pasa despues di un carera di 17 aña cu e noticiero. Su salida a yega tiki mas cu dos luna despues cu el a pidi disculpa pa comentarionan en bibo tocante e candidato presidencial e tempo ey, Nikki Haley, bisando cu e no ta den “su miho”, cu el a haci durante su racha cortico como anfitrion di show host.
