(AP) – Den un movida cu no ta hopi usual den loke ta e adkisicion di Twitter di parti di e homber mas rico mundialmente, CEO di Tesla, Elon Musk a reuni virtualmente cu e paltaforma social su empleadonan riba diahuebs, aunke su oferte di 44 biyon dollar te ainda no a ser completa.

“Confiansa ta confiansa. Mi ta hopi literal den loke mi ta bisa. Bo no mester purba lesa entre e linea pa saca afo loke mi kier bisa, bo por djis lesa loke mi ta bisa,” Musk a bisa den e reunion segun un tweet di Nola Weinstein, Twitter su director global.

Weinstein no a responde inmediatamente na peticionnan pa mas comentario, y a elimina tur su publicacionnan tocante e reunion. Twitter a nenga di duna comentario.

Musk, segun Multiplenews su reportahe, tambe a papia tocante posibel terminacionnan di empleo na e compania, bisando “actualmente, e costonan ta mas halto cu e ganashi. Esaki no ta un bon situacion.”

Tambe el a papia tocante crecemento, bisando cu e kier mira Twitter yega na un biyon usuario, cual ta mas o menos 4 biaha mas di su cantidad di usuario actual, y anonimidad, unda cu anteriormente el a causa controversia bisando cu e kier pa e servicio “verifica tur persona humano.” Na e reunion, tambe el a clarifica cu esaki no ta nifica cu e kier pa tur hende riba e plataforma usa nan nomber real, manera na Facebook, unda cu un ‘nickname’ por yuda personanan expresa nan opinionnan politico libremente segun New york Times.

CEO di Twitter Parag Agrawal a anuncia e reunion di tur empleado den un e-mail riba dialuna, bisando cu nan por entrega cualkier pregunta cu nan por tin di antemano. E reunion ta “un paso cla den direccion di e chens cu un trato lo pasa en realidad, y un movida sabi y strategico mirando cu empleadonan di Twitter no tabata altanto di hopi cos durante e ultimo simannan aki, y tin varios pregunta tocante e periodo aki di incertidumbre,” analista di Wedbush Daniel Ives a comenta.

Un di Musk su puntonan clave na e reunion,tabata di haci Twitter “asina bon cu bo no por biba sin esaki,” Weinstein a publica. Musk, ken tin mas di 98 miyon siguidor riba Tiwtter y ta un di e plataforma su usuarionan mas activo, tambe a bisa cu “mientras varios ta usa nan cabey pa expresa nan mes, ami ta usa Twitter,” segun Weinstein.

Segun varios reportahe, Musk tambe a elogia aplicacionnan Chino manera TIkTok, cual el a bisa ta hopi bon den mantene personanan activo y entreeni, mencionando tambe WeChat como un bon modelo pa loke Twitter por bira.

“Transforma Twitter den un super aplicacion manera WeChat lo ta masivo pa Musk,” Jasmine Enberg, analista principal na Insider Intelligence a bisa. “Cambia e comportamento di nos usuarionan ta algo hopi dificil, cual Meta rapidamente a descubri durante su mesun ambicionnan di un ‘super app’.

Musk a yega un trato pa adkiri Twitter den april, pero a tene confrontacionnan cu e compania varios biaha, e tempo aki tocante e cantidad di cuentanan falso cu ta existi riba e plataforma. Musk a bisa cu e lo pone e trato aki den pausa riba dia 13 di mei, aunke aparentemente e no por haci esaki su mes. Musk a bisa cu e tin mester di data di e compania tocante e cuentanan aki, apesar di e hecho cu Twitter a reporta su calculacion caba, ademas di admiti cu posiblemente e calculacion aki ta hopi abao na inversionistanan pa añanan largo caba.

LEAVE A REPLY

Please enter your comment!
Please enter your name here