(AP) – Naomi Osaka a biba un momento inolvidabel na e apertura di e Olimpiada na Hapon. E tabata un momento cu a marca historia den Hapon, inhusticia racial, pa tur atleta femenino y pa e deporte di tennis.

E ganador di 4 Grand Slam a ser duna e honor di sende e candela na e ceremonia di apertura di e Olimpiada na Tokyo riba diabierna.

E tabata un decision cu a ser aprecia mundialmente. Na Hapon claramente pa motibo cu Osaka a nace na Hapon, y ta e pais cu e lo ta representando. Pa Haiti, pa motibo cu ta di e pais aki su tata a nace. Y tambe Merca pa motibo cu ta eynan e gran atleta, ken ta e atleta femenino mas paga ta biba, y ta unda cu el a cuminsa e lucha contra inhusticia racial.

Tambe, pa motibo cu unda cu Osaka bay, e ta mira como un gran celebridad.

Apesar di esaki, Naomi a yega di ricibi algun ricibimento un poco racista y inconfortabel na Hapon pa motibo di su rasa, y cu su famia a muda bay Merca ora cu e tabatin 3 aña di edad. Su aumento den fama y popularidad a enfrenta actitudnan publico pa cu identidad di un persona den un cultura homogeno cu ta ser pusha den direccion di cambio.

Semper e persona cu ta ricibi e honor di sende e candela ta keda un misterio te na e dia di e ceremonia.

Sadaharu Oh, Shigeo Nagashima y Hideki Matsui ta algun di e personanan grandi den baseball cu a yega di ricibi e honor di sende e candela na e stadion. Y den un pais unda cu baseball ta e deporte number 1, Osaka no tabata un persona premira di ricibi e honor grandi aki.

Sinembargo, ta Naomi a aparece den centro di e escenario unda cu un trapi a sali, y e ketel a habri riba di un punta cu tabata inspira pa y representa Mount Fuji, y despues a cuminsa subi e trapi cu e bandera Olimpico y Hapones ta bula na su banda. El a pone e torch cu e candela den e ketel, cual a sende e candela den e ketel y klapchi a bay of su tras yenando e shelo cu color.

“Sin duda, esaki tabata e momento di logro atletico mas grandi di mi bida, y e honor mas grandi tambe cu mi a yega di ricibi”, Osaka a publica riba e red social Instagram hunto cu un potret di su persona wantando e torch cu tabatin e candela. “Mi no tin palabra pa describi e sentimentonan cu mi tin aworaki. Pero si mi por bisa cu mi ta yen di sentimentonan di gratitud y gracia.

E momento aki a serca un serie di eventonan importante durante e ultimo dos lunanan aki pa e atleta di apenas 23 aña.

Drentando e French Open den final di mei, Osaka, ken ta clasifica number 2, a anuncia cu e no lo ta papiando cu e reporteronan ni prensa na e torneo, pa motibo cu e conversacionnan y interaccionnan aki ta causa hopi duda na su persona.

Despues di su victoria den e prome ronda di e torneo, e no a presenta pa e conferencia di prensa mandatorio.

Osaka a ser duna un boet di 15,000 dollar y sorprendentemente a ser critica publicamente pa e personanan encarga di e torneonan Grand Slam, kendenan a comenta cu e lo por keda suspendi si e sigui evita e personanan di prensa y di medio.

E siguiente dia, Osaka a retira for di Roland Garros completamente pa asina por tin tempo pa por traha riba su salud mental, revelando cu e tabata lidiando cu depresion.

Tambe el a dicidi di no participa den Wimbledon. Haciendo cu e Olimpiada na Tokyo ta marca su regreso na competencia.

“E Olimpiada ta un momento special, unda cu henter mundo ta bini hunto pa asina por celebra deporte. Mi ta hopi emociona pa por ta cu e atletanan cu a warda y a entrena pa mas di 10 aña, y pa celebra un aña hopi duro cual tabata 2020, y e hecho cu esaki lo tuma luga na Hapon ta haci cu e momento aki ta bira uno hopi mas special” Osaka a skirbi den un entrevista via email ora cu el a ser selecciona como Associated Press su atleta di aña femenino pa aña 2020. “E ta un pais special, y bunita, yen di cultura, historia y beyesa. Mi no por ta mas emociona.”

Tabatin algun pista cu Osaka lo por ricibi un rol importante den e ceremonia na momento cu su prome ronda di competencia den e torneo Olimpico di tennis a ser movi di diasabra pa diadomingo sin ningun splicacion anteriormente den e dia.

Originalmente, Osaka mester a hunga contra Zheng Saisai di China, ken ta clasifica number 52 den e prome wega di e torneo den e veld centrico riba diasabra mainta. Pero claramente, mirando cu den oranan laat di anochi Osaka mester a sende e candela den e ketel, su persona no lo por a tin suficiente tempo pa descansa prome cu e wega.