Lamentablemente reunion di presupuesto 2021 a habri cu wega politico. Ta pone interes partidario pa pasa un presupuesto irealistico riba interes general pa debati tur e problemanan structural di e manera cu gobierno ta traha su presupuesto.

Bon gobernacion, transparencia y integridad den gobernacion ta cuminsa cu honestidad y un compromiso cu e principionan di nos estado di derecho democratico. Nos tin miedo di un gobierno cu no ta tene su mes na ley, cu no ta worry cu ley y cu ta actua como si fuera e mes ta ley. P’esey e estado di derecho ta conoce e Rule of Law, cu ta nifica cu ta leynan mester goberna nos gobernantenan y cu niun gobernante no por eherce autoridad publico sin cu e tin un base legal pa esaki.

Desde nos Status Aparte nos tin un Constitucion propio cu ta bisa cu e presupuesto di Pais Aruba mester ta hancra den ley. Tambe Constitucion ta bisa cu e presupuesto aki mester wordo entrega na parlamento no mas tarda cu dia 1 di september di e aña anterior. Segun nos Ley di Contabilidad un minister mester consulta e ley di presupuesto aki prome cu e haci cualkier gasto. E minister cu ta surpasa e presupuesto mester paga e placa cu ta surpasa presupuesto for di su mesun saco. Minister Glenbert Croes por splica bon cu bo mester keda den e marco di e presupuesto.

Semper nos lo wordo confronta cu situacionnan hopi dificil. Den e area financiero nunca placa ta yega pa tur locual nos kier y semper nos mester di mas. E solucion pa por logra exito duradero den bida ta si ta traha structura. Esey ta nifica cu ora un persona ta haya su salario e mester dicidi kico ta mas importante p’e. Traha structura ta nifica cu nos mester wak bon kico nos gastonan ta y tambe wak nos entrada bon. E ora nos por planea con nos placa por yega te fin di luna y con nos por cumpli cu tur nos debernan den un aña. Presupuesto di Pais Aruba ta hustamente esey: un plan pa futuro. For di dia prome di januari un minister mester consulta su presupuesto pa e por sa kico e por gasta y kico no. Traha di e manera aki ta parti esencial di bon gobernacion financiero. Un bon presupuesto ta cumpli cu locual LIM ta exigi di cada minister den articulo 9 inciso 2: ‘een financieel beheer dat voldoet aan de eisen van rechtmatigheid, ordelijkheid en controleerbaarheid, dat op een zo doelmatig mogelijke wijze wordt ingericht’.

Si un presupuesto mester ta un plan pa futuro, ta kico ta e balor di presupuesto 2021? Un minister por consulta e presupuesto aki pa e gastonan cu e lo haci na januari di e aña aki, of februari of maart? E realidad ta cu e presupuesto aki no por bisa na unda e placa mester bay, simplemente paso gran parti di aña 2021 a bay laga nos caba. Ademas, miyones di florin a wordo gasta caba sin un presupuesto. Nos como pais ta trahando na un forma structura? Segun nos constitucion dentro di seis siman, esta dia 1 di september benidero, nos ta supose di haya e siguiente presupuesto. E presupuesto ey pa aña 2022 a wordo entrega na CAft caba? Si esey no ta e caso, e aña aki atrobe gobierno no lo cumpli cu su deber constitucional pa entrega presupuesto no mas tarda cu dia 1 di september.

Faltando menos cu seis siman pa e deadline pa presupuesto 2022, Parlamento ta bay discuti presupuesto 2021 cu mester a wordo entrega 11 luna pasa! Hecho ta cu gobierno no a cumpli cu nos ley nacional mas halto: nos Constitucion. Hecho ta cu e ley aki no lo por cambia e realidad cu tempo a bay laga nos caba y e presupuesto aki a perde tur balor como plan di accion pa gastonan di gobierno. E unico balor di aproba e presupuesto aki ta pa salba un tiki di nos ordo di derecho: after the fact nos ta crea un base den ley pa e placa cu a wordo gasta pa shete luna largo. Y hasta e base legal aki ta dudoso, pasobra nos no sa cuanto a wordo gasta te awor y manera nos tur sa nos prognostico financiero-economico tabata demasiodo pesimista. Para y pensa un rato: ta ki control e Parlamento aki ta bay eherce riba e ministernan, si e parlamento aki ta consisti di varios minister cu nos ta supose di controla. Na Hulandes tin un dicho: de slager die zijn eigen vlees keurt. Por lo menos di e manera aki nos ta proteha nos ministernan for di e mesun mala suerte cu a toca na minister Glenbert Croes ora el a viola ley di Contabilidad. Finalamente mester enfatiza cu delibera riba e cifrasnan ta perdida di tempo. Simpelmente paso e presupuesto 2021 ta basa riba un vision di un coalicion ku no ta existi mas. Ademas no ta conoci cua portefeuille-verdeling e formacion lo genera. Consequentemente e presupuesto aki ta irealistico y superfluo…

LEAVE A REPLY

Please enter your comment!
Please enter your name here