(Yahoo News) – Embahador di Merca na Mexico, Ken Salazar, a calcula cu na frontera entre ambos pais tin mas di 200 tunnel usa pa narcotraficante pa crusa droga di un nacion pa otro.

Salazar a duna e declaracionnan aki durante un bishita na Tijuana, Baja California, unda a señala cu tin trabou conhunto pa caba cu e luganan aki.

“Den area aki tin mas di 200 tunnel na frontera, trahando cu gobierno Mexicano nos tin un colaboracion hopi bon pa trata di elimina e tunnelnan aki cu no mester existi pasobra eynan ta unda ta pasa hopi criminalidad, hopi sufrimento cu nos ta wak, cu mester stop”, e diplomatico a bisa pa medionan.

E declaracionnan di Salazar ta producto di contexto di e revisionnan cu Mexico y Merca a haci pa e resultadonan di Entendimiento Bicentenario, como ta conoci e instrumento di cooperacion den siguridad cu e cual a substitui e iniciativa Merida.

Tambe den caminda pa Cumbre di America cu ta planea pa juni na Los Angeles, California, na unda ta espera cu gobiernonan di paisnan di e region lo papia di problemanan comun.

Sinembargo, ta existi diferencianan pa loke ta trata e invitadonan pa e encuentro. Merca no tin planea di invita Cuba, Nicaragua ni Venezuela, na unda su gobiernonan ta ser considera como dictadura, mientras cu Mexico ta pidi pa no exclui nan. E postura aki a ser respalda pa Honduras y Bolivia.