NASA y SpaceX a scoge fecha di 27 mei pa resumi lansamento di astronauta pa Merca despues di nuebe aña di dependencia total riba Rusia.
Administrador di NASA, Jim Bridenstine a anuncia e fecha di lansamento diabierna. No a lansa astronautanan den orbita for di Merca desde e ultimo vuelo di space shuttle di NASA na 2011. SpaceX tin como meta pa termina e secura mandando dos astronauta di NASA na Stacion Espacial Internacional (ISS).
Astronautanan Doug Hurley y Bob Behnken lo ser lansa for di un raket SpaceX Falcon 9, saliendo for di e mesun pad di lansamento na Kennedy Space Center usa pa e shuttle Atlantis na juli 2011, como tambe e lansamentonan Apollo na luna mei siglo pasa. Hurley a sirbi como un piloto riba e ultimo mision di shuttle ey y lo ta comandante di astronave pa capsula di tripulacion Dragon di SpaceX.
Dia di lansamento lo ta un diaranson, cu ora pa 4.32pm EDT. Ta mucho trempan pa sa si e coronavirus lo pone restriccion pa multitud mira e lansamento.
Unicamente tres pais a lansa hende den orbita desde 1961: Rusia, Merca y China, den e orden ey. SpaceX lo ta e prome compania.
SpaceX exitosamente a conduci su prome vuelo test di un capsula di tripulacion Dragon un aña pasa, mandando e capsula – sin e tripulacion – na ISS. A destrui e capsula accidentalmente despues cu el a bolbe, durante ground testing na Cape Canaveral, retrasando mas ainda e lansamento di astronauta.
Cu e tripulacion di ISS awo apenas tres, Hurley y Behnken lo pasa algun siman, talbes luna, yudando mantencion di e laboratorio den orbita. E duracion di nan mision ainda ta bou revision, segun NASA.
Mientras tanto, NASA ta den proceso di cumpra otro asiento abordo di un raket Ruso. Capsulanan Soyuz di Rusia ta e unico medio pa transporta tripulacion pa y for di ISS desde 2011.
SpaceX ta usando raket Falcon 9 pa lansa cargo na ISS den e capsulanan Dragon original di e compania desde 2012. NASA a busca companianan priva pa haci entrega desde cu e programa di shuttle a termina.
Boeing tambe ta trahando pa lansa astronautanan bou di programa di tripulacion comercial di NASA, pero esfuersonan di e compania a sufri un retraso serio despues di un test fayido december ultimo. Lansando sin tripulacion abordo, e capsula Starliner di Boeing no a logra alcansa ISS despues di bay den e orbita robes, y tabata cerca di destruccion dos biaha pa motibo di eror di software. Boeing tin plan pa repeti e vuelo test, atrobe sin astronauta, e herfst aki.
