(Infobae) – Pruebanan tecnico na Maryland a valida maniobranan autonomo di descenso di e vehiculo aereo, cu lo busca señal tocante origen kimico di bida riba luna mas grandi di e planeta cu renchinan.

NASA a haci simulacionnan na Maryland pa test con helicopter Dragonfly lo bula riba Titan, luna mas grandi di Saturno. Lansamento di e mision ta plania no prome cu 2028.

E pruebanan a ser haci riba un platafoma na Johns Hopkins University Applied Physics Laboratory na Laurel. Aya, ekipo a recrea sistemanan y maniobranan cu Dragonfly lo mester ehecuta autonomamente ora e yega Titan na 2034.

E scenario simula a reproduci e secuencia despues cu e vehiculo separa for di su protector. Dragonfly ta bula riba duinnan recrea, scanea tereno pa seguridad, bira, baha y aterisa.

Despues di lansamento, e nave espacial lo biaha durante seis aña pa Titan y despues pasa tres aña haciendo vuelonan entre diferente luganan. Su meta ta studia kimica, geologia y atmosfera di e luna pa amplia conocemento tocante origen kimico di bida.

Simulacion a combina sensor y maniobranan plania pa Titan

E prueba a ser haci na Applied Physics Laboratory (APL) di Johns Hopkins, unda Dragonfly ta pasando door di su fase di integracion y prueba.

Segun ekipo, esaki tabata e evaluacion mas completo te awo di prome vuelo di helicopter den tempo real y cu avion similar na esun cu lo ser usa durante mision.

E sistema a combina software di vuelo y avion cu datonan simula for di instrumentonan cu e aeronave lo usa riba Titan.

Entre nan tabatin camaranan di nabegacion, unidadnan di midimento inercial y sistema lidar cu recientemente a ser instala.

“Loke ta interesante tocante prome vuelo ta cu e ta nos vuelo mas desafiante,” Zach Putnam, ingeniero principal di subsistema di mobilidad di Dragonfly na APL, a bisa. “E ta usa tur componente di hardware di sensor di vuelo di e lander.”

E team a construi capacidadnan di vuelo paso pa paso.

Prome, nan a ehecuta simulacionnan di tareanan mas limita, manera haci solamente un rotor bira. Despues a sigui pruebanan di un vuelo cortico pa reposiciona y un operacion parcial di reconocimento.

Na cada etapa, mas sensor y funcion a ser agrega.

“Haci e gradualmente ta loke a permiti nos realisa e pruebanan aki,” Putnam a splica. Adicion di lidar a completa e elementonan necesario pa recrea e ambiente cu Dragonfly lo enfrenta riba Titan.

E instrumento aki lo permiti midi haltura y inclinacion di superficie, y tambe detecta posible riesgonan durante descenso y landamento.

Pa test e, ingenieronan a genera un tereno simula y a produci den tempo real e imagennan cu camaranan di nabegacion lo captura.

Un emulador di camara diseña pa e mision a usa unidadnan di procesamento grafico pa genera cada escena simula di Titan.

E exposicionnan a dura entre 20 y 70 miliseconde, similar na esun cu camaranan ta usa durante vuelonan real.

Pruebanan ta midi intercambio di informacion cu ta dura miliseconde

Ehecucion di e secuencia completo cu hardware similar na esun cu lo ser usa den vuelo a permiti observa con tur e componentenan ta traha hunto.

E evaluacion a inclui intercambio di informacion entre diferente procesonan instala na bordo di lander, hasta esnan cu ta pasa den miliseconde.

“E pruebanan aki ta duna validacion importante cu tur cos ta traha hunto,” Putnam a bisa.

Sinembargo, campaña di prueba ta sigui.

Ekipo ta plania ripiti prome vuelo cu sistema real di vuelo di Dragonfly, enbes di usa un platafoma di prueba, y lo usa avionica real di helicopter.

Ingenieronan tambe lo evalua otro perfilnan di vuelo y deliberadamente introduci fayonan pa wak si e vehiculo por reacciona sin intervencion humano ora un problema pasa.

Autonomia lo ta un condicion central pa e mision.

Pa motibo di distancia entre Titan y Tera, Dragonfly no lo por ricibi asistencia den tempo real mientras e ta bula.

“E autonomia ey ta esencial riba Titan, unda Dragonfly lo mester bula sin asistencia den tempo real for di Tera,” Putnam a bisa. “Tur cos cu nos haci riba Titan mester ser haci autonomamente.”

Sistema di posicionamento ta prepara Dragonfly prome cu descenso

Prome cu Dragonfly cuminsa su prome vuelo riba Titan, e mester tuma e posicion necesario pa opera.

P’esey, paralelamente cu pruebanan di nabegacion, ekipo ta evalua mecanismonan cu lo baha e aeronave for di su luga di almacenamento.

E sistema mester baha Dragonfly bao di parti atras di sistema di entrada.

Aya, e lo por cuminsa usa su rotornan cu seguridad, separa for di structura di entrada y cuminsa descenso final pa superficie di Titan.

E campaña ta concentra riba mecanismo di posicionamento, cu lo move rotor for di su posicion di almacenamento den parti atras pa posicion di liberacion durante descenso door di atmosfera di e luna.

Ingenieronan na Lockheed Martin na Colorado a haci pruebanan statico cu un peso representativo.

Nan a aplica empuhe y halamento riba e mecanismo pa verifica cu e por soporta carganan spera.

Tambe nan a haci pruebanan di desplegamento pa midi si sistema ta baha suavemente y rapido, y si e keda sigura unabes e yega na su posicion.

E pruebanan tambe ta considera cu area patras tapa di Dragonfly por move of zwaai bao di parachute mientras helicopter ta ser desplega.

Pa test respuesta di e mecanismo, ingenieronan ta inclina aparato di prueba na diferente angulo y ripiti e secuencia di desplegamento.

E structura di posicionamento ta conecta cubierta trasero cu un structura di interfas di aluminium cu ta conecta na lander di Dragonfly.

Durante descenso, e mecanismo lo bah’e y, hunto cu ne, e aeronave.

Despues rotor lo separa y Dragonfly lo cuminsa bula cu su propio poder.

E pruebanan tin como meta sigura cu e transicion aki funciona cu confiabilidad prome cu Dragonfly mester haci e casi un biyon kilometer for di Tera.