Recientemente riba website di e conocido National Geographic, den un articulo dedica na e celebracionnan mas unico di Aña Nobo den continente Americano a destaca e kimamento di klapchi na Aruba.
“Na Aruba, shownan vivido di pyrotechnica yama klapchi ta cende shelo na candela den Bispo di Aña Nobo,” segun e articulo, cu ta cita vocero di Aruba Tourism Authority, Emily Garcia, bisando: “Hopi biaha, bisiñanan ta uni man pa crea un despliegue enorme.”
E articulo ta titula “Whale watching on New Year’s? These are the most unique celebrations across the Americas” y ta menciona, ademas di Aruba, Bahamas, Oregon, Maine y Missouri pa actividadnan interesante pa celebra e cambio di aña.
E articulo ta nota cu mientras cu turista no ta permiti pa kima klapchi na nan hotel, toch por disfruta di eventonan memorable di klapchi na varios resort.
Cu esaki, e publicacion a invita lesadornan pa disfruta di e tradicion aki na Aruba.
