E ta un tristesa pa Aruba cu ainda no tin un Ombudsman. Asina Nationale Ombudsman di Hulanda Reinier van Zutphen a bisa. Motibo ta cu comunidad mester di haya ayudo adicional.

E comentario ta den luz di e lectura organisa siman pasa pa e Genootschap Nederland Aruba, GNA, unda Nacionale Ombudsman Reinier van Zutphen a splica su rapport ‘Preocupacionnan di e Studiantenan Caribense.’

E rapport a bln a base di un estudio memey di studiantenan di Caribe kende pa motibo di hopi factor ta keda desanima den nan estudio nan Hulanda of ta pone nan confronta problema adicional durante nan periodo di estudio.

Y un di e puntonan cu mesora van Zutphen a ilustra ta cu Aruba ta e unico pais den Reino Hulandes cu no tin un Ombudsman, esta e instituto cu ta asisti ciudadanonan cu ta sinti cu decisionnan di Gobierno ta afecta nan.

“Corsou y St. Maarten tin nan Ombudsman y tin un bon colaboracion cu nan,” van Zutphen a bisa. A pasa e ley na Aruba berdad pa institui e Ombudsman pero ainda falta e nombramento y e oficina. Van Zutphen a bisa comunidad di Aruba pa pusha Parlamento pa sigui cu e proceso.

Interes pa nos paisnan den Caribe

Reinier van Zutphen ta e Ombudsman nacional di Hulanda desde 2015. Tweede Kamer a nombr’e y a extende e nombramento recientemente. E Ombudsman ta un instituto independiente y neutral. Na Hulanda, e Ombudsman y su organisacion di como 180 hende, ta ricibi como decenanan di miles di pregunta y keho riba e diferente nivelnan di Gobierno na Hulanda. Na 2019, e cantidad tabata riba 30 mil.

Van Zutphen tabata hopi aña huez na Corsou, y durante e periodo aki, el a siña conoce Aruba y otro paisnan. Confianza di un ciudadano den un Gobierno cu ta funciona bon ta algo bon pa un pais. Recientemente el a mishi e tema cu Informado Herman Tjeenk Willlink di Hulanda, y durante su lectura, el a bisa di ta dispuesto pa hinca tur su esfuerso pa realisa e instituto na Aruba.

Ehempel di Milena y Deon

Anualmente tin como 1600 studiante for di Corsou, St. Maarten, Islanan BES y Aruba ta bay Hulanda pa sigui nan estudio superior. E problemanan cu nan ta confronta cune ta existi caba pa hopi tempo y ta conoci. Presidente di GNA Nico van Grieken a cita dos studiante, Milena di 24 for di Boneiro y Deon, 31, for di Aruba. “Milena a scoge na 2018 pa studia na Hulanda. A bis’e cu na Hulanda tin miho oportunidad y cu e ta miho pa e idioma. Milena ta custumbrando mas y ta adapta, pero e tabata hopi pisa. Milena a mustra cu ta spera na Hulanda cu e studiantenan di e paisnan den Caribe ta domina e idioma Hulandes na un nivel, pero esey no ta e caso pa mayoria.

Deon di otro banda a bay Hulanda na 2010. El a caba su estudio na 2018, na United POP, Amsterdam. “Tur cos ta bay asina poco poco na Aruba,” Deon a conta. “Hendenan no ta cumpli tur ora cu palabracionnan, y e velocidad ta hopi abou. Como tal, e no ta un sorpresa cu pa hopi studiante, e ta cu shock cultural ora yega Hulanda. E prome dos aña na Hulanda tabata basta traumatico. Pa motibo cu mi a bay haci un estudio na nivel di MBO, mi no tabatin e derecho riba guia. Unicamente studiantenan cu bay studia na nivel HBO of WO (Universidad) tin derecho di sosten di Arubahuis y e Arubalening.”

Van Zutphen a bisa cu e problemanan no tin solamente di haber cu Hulanda sino cu e situacion na e islanan tambe. Pero na nivel di maneho, no tin mucho coherencia entre e diferente Ministernan di e paisnan. “E gabinetenan di Ministernan Plenipotenciario lo mester traha mas cu otro,” e Ombudsman a bisa.

Number di servicio di ciudadano (burgerservicenummer)

Un di e problemanan mas grandi ta pa studiantenan obtene nan BSN, esta nan burgerservicenummer. Nan por pidi e number aki unicamente ora nan yega Hulanda y ta inscribi na un municipio. Algun ta duna e number mesora, pero otro por tuma algun siman. Y sin e number aki, studiantenan no por regla asuntonan necesario, manera habri un cuenta di banco. Van Zutphen ta urgi pa percura cu studiantenan haya nan BSN prome cu nan bay Hulanda. E tin speranza cu e cambio aki lo por sosode pronto.

Seguro

Un otro problema ta cu studiantenan di Caribe, por tin un paspoort Hulandes, pero nan ta exclui di e seguro basico di salud na Hulanda. Consecuentemente nan no ta bin na remarca pa e asina yama zorgtoeslag. Nan mester cera un seguro internacional di cuido, cu hopi biaha no ta cla y ta crea confusion.

Stephan Sjouke, Hefe Asuntonan Internacional na e Nationale Ombudsman a splica cu hopi studiante di Caribe mester di sosten psicologico pa motibo di e diferencianan cultural grandi. Pero nan no ta haya e sosten psicologico cubri den e seguro.

Debe di estudio

E debe di estudio tambe ta un peso enorme, segun Sjouke. “Esey ta e caso despues di graduacion, particularmente cerca esnan cu dicidi pa bolbe e islanan. Nan ta experiencia cu apenas nan ta keda cu placa ora di paga nan debe di estudio. E salarionan ta relativamente abou y e costo di bida ta halto.” Segun Sjouke, no ta tene cuenta ora di determina kico por carga na debe y con mester paga bek, na e situacion local of e hecho cu por tin otro debe. Mas ainda, na Aruba, mescos cu na Corsou y St. Maarten no ta paga e graduado automaticamente segun su nivel, contrario cu na Hulanda. Pues, un maneho di gobierno y un bon areglo di pago ta esencial.”

Idioma Hulandes

Van Zutphen y Sjouke a enfatisa cu hopi instituto di estudio no ta suficiente informa cu Hulandes ta un idioma stranhero pa hopi di e studiantenan cu ta bin di Caribe. “E no ta e idioma cu e personanan ta papia ora cu nan lanta for di cama. E ta y ta keda e idioma di instruccion na scol. Esey mester cambia. Hobennan cu caba VWO of HAVO ta inteligente, pero mester ta consciente cu nan idioma natal no ta Hulandes. Tambe mester tin atencion pa studiantenan cu ta sigui MBO na Hulanda, kendenan ta conoci como ‘free movers.’ Nan no ta bin na remarca pa guia. “Nan problemanan ta grandi y e ta dificil pa haya e grupo aki den miho bista.”

Pobresa y refugiado

Los di e ‘Kopzorgen van Caribische studenten’ Reinier van Zutphen tambe a mishi e problemanan cu Corsou y Aruba mester atende cune. Manera, e pobresa memey di un gran parti di e comunidadnan, tambe riba islanan BES, y problema cu refugiado y migracion for di Venezuela. “Pa tanto e refugiado cu ta hendenan vulnerabel, ilegal y abusa, como e ciudadano pober ta conta mesun cos. Nan tin’e dificil y pisa.” Pa e motibo aki tambe Nationale Ombudsman lo cuminza cu un investigacion riba e problematica di refugiado y buscadonan di asilo.

LEAVE A REPLY

Please enter your comment!
Please enter your name here