(AP) — NATO ta bay manda 700 trupa mas nort di Kosovo pa yuda calma protesta violento despues cu enfrentamentonan cu Serbionan etnico eynan a laga 30 soldad herida, e aliansa a anuncia ayera.
E violencia mas recien na e region a crea miedo di un reanudacion di e conflicto di 1998-99 na Kosovo cu a cobra mas di dies mil bida, a laga mas di un miyon persona sin hogar, y a resulta den un mision di paz di NATO cu a dura casi un cuarta parti di un siglo.
E enfrentamentonan a aumenta for di un confrontacion cu a desaroya siman pasa despues cu oficialnan di etnicidad Albano eligi den votacion abrumantemente boicotia pa Serbionan a drenta edificionan municipal pa asumi nan cargo. Ora e Serbionan a blokea nan, polis di Kosovo a tira gas lagrimogeno pa dispersa e multitud.
Mas violencia a sigui dialuna ora cu Serbionan a enfrenta cu polis y personal di paz di NATO.
Secretario-General di NATO, Jens Stoltenberg a bisa cu un batayon adicional di reserva lo ta cla den caso cu mester trupanan adicional.
E mision di paz lidera pa NATO na e region ta conoci como KFOR y actualmente ta consisti di cas 3,800 trupa.
Como respuesta na e confrontamento siman pasa, Serbia a pone ehercito di e pais den e estado mas halto di alerta y a manda mas trupa na e frontera cu Kosovo. E Serbionan a protesta atrobe dialuna, insistiendo cu tanto e alcaldenan Albano como polis di Kosovo mester bandona e region nort.
E conflicto na Kosovo a explota na 1998 tempo cu separatistanan di etnicidad Albano a rebeldia contra gobierno di Serbia, y Serbia a responde cu un accion brutal. Como 13mil persona, mayoria di etnicidad Albano, a muri. E intervencion militar di NATO na 1999 eventualmente a forsa Serbia pa sali di e teritorio y a habri caminda pa establecimento di e mision di paz KFOR.
