(AFP)—Israel no a aproba e plan pa Gaza cu Merca ta apoyando, prome minister Benjamin Netanyahu a bisa, hasta despues cu el a ricibi garantia cu un retiro di forsanan Israeli lo tuma luga solamente despues cu Hamas entrega tur su armanan.
Movemento Islamico Palestino Hamas, entretanto, a reafirma su compromiso cu e plan publica siman pasa pa Directiva di Paz di presidente Mericano Donald Trump, cu ta inclui disposicionnan pa e grupo entrega su armanan y pa Israel retira su forsanan.
Den un video publica riba su cuentanan di red social diamars anochi, Netanyahu a bisa cu ekipo di Trump “ta kere cu nan por logra desarma Hamas y desmilitarisa Gaza”.
“Nos ta revisando esaki. Nan a manda nos un propuesta. Nos no a aproba esaki; no ta nos propuesta. Nos a manda nos comentarionan,” el a bisa.
Hefe di ehercito Israeli a bisa diaranson cu forsanan di e pais lo sigui “opera activamente” den teritorio Palestino, primintiendo cu nan lo “sigui persigui esnan responsabel” pa e atake di Hamas di 7 di october 2023 cu a desencadena e guera.
“Den Franha di Gaza nos a dal Hamas, debilitando considerablemente e grupo y cambiando fundamentalmente e situacion di seguridad,” teniente-general Eyal Zamir a bisa durante un bishita na trupanan den Gaza, segun un comunicado militar.
“IDF lo sigui opera activamente y segun e principio cu nos a establece: elimina menasanan y, den tur situacion, proteha comunidadnan, nan residentenan y nan seguridad.”
Despues cu Israel a expresa obhecion contra e plan original, Directiva di Paz a reuni cu Netanyahu dialuna y a duna garantia cu ehercito Israeli lo mester retira for di su posicionnan actual na Gaza solamente despues di un “desarmamento completo” di Hamas.
Sin embargo, presion riba e prome minister Israeli ta sigui aumenta. Dos minister ultra-derechista a pidi un voto nobo pa rechasa e plan, alegando cu esaki no ta refleha loke gabinete a aproba.
‘No tin otro opcion’
Cu Israel y Netanyahu cada bes mas isola riba escenario mundial, e pais tin poco posibilidad di deshaci e plan cu Merca ta patrocinando, segun Tal Elovits, un investigador di centro di estudio Israeli Molad.
“Netanyahu no tin otro opcion cu tende su unico amigo cu a keda den comunidad diplomatico,” el a bisa, referiendo na Trump.
Papiando durante un evento diaranson, Netanyahu, cu ta enfrentando un eleccion dificil na october, a bisa cu Trump “ta nos mihor amigo, un di e mihor amigonan cu nos a yega di tin na Cas Blanco”.
Vocero di Hamas, Hazem Qassem, a reafirma diaranson e “compromiso” di e grupo cu loke a ser acorda cu mediadornan y cu Directiva di Paz. E grupo a haci yamado na Merca y Nickolay Mladenov, representante di Directiva di Paz pa Gaza, pa pone presion riba Israel “pa cumpli cu e acuerdo, pa nos por mira pasonan serio y practico”.
Media Israeli a reporta cu trupanan a ricibi instruccion pa busca autorisacion di hefe di ehercito prome cu ehecuta atakenan den Gaza, cu excepcion si nan ta den “peligro inmediato”. Esaki ta un cambio di politica compara cu directivanan anterior, unda tabatin mester solamente di aprobacion di comandante regional.
Ora AFP a pidi pa un comentario, ehercito Israeli a referi pa e “nivel politico”.
Un vocero di Netanyahu a nenga di comenta.
