(AP) – Oficialnan na New York City a declara un emergencia di salud pa causa di e brote di Monkeypox diasabra, yamando e ciudad e “epicentro” di e brote.

E anuncio riba diasabra haci pa alcalde Eric Adams y Comisario di salud Ashwin Vasan a bisa cu 150,000 residente di e ciudad por ta den riesgo di infeccion. E declaracion aki lo permiti oficialnan haci uso di ordennan di emergencia bao di e ciudad su codigo di salud y aregla provision di codigonan pa implementa medidanan cu lo por yuda combati e brote.

Durante e 2 ultimo dia, gobernador di New York Kathy Hochul a declara un estado di emergencia y e departamento di estado di salud a yama Monkeypox un “menasa iminente na e salud publico.”

New York a reporta 1,345 caso riba diabierna, segun data colecta pa Centers for Disease Control and Prevention. California tabatin e di dos cantidad mas halto cu 799.

“Nos lo continua cu nos trabao pa cu nos partnernan federal pa sigura mas dosis na momento cu esaki bira disponibel,” Adams y Vasan a bisa den e declaracion. “E brote aki mester ser trata cu urgencia, accion y recursonan, ambos na nivel nacional y global, y esaki ta e declaracion di un emergencia di salud publico cu ta refleha con serio e momento aki ta.”

World Health Organization a declara Monkeypox un emergencia di salud global dia 23 di juli y San Francisco su alcalde riba diahuebs a anuncia e estado di emergencia tocante e cantidad di casonan cu ta keda crece.

E malesa aki cu algun dia tabata un malesa poco comun, tin decada caba estableci na partinan central y west na Africa pero awo ta conoci pa a causa un brote grandi fuera di e continente of cu a plama entre personanan te cu mey, ora cu autoridadnan a detecta decenas di epidemia na Europa, Norte America y otro paisnan.

Te cu awe, tin mas di 22,000 caso di Monkeypox a ser reporta den casi 80 pais desde mey, cu mas o menos 75 morto sospecha fuera di Africa, mayoria na Nigeria y Congo. Riba diabierna, Brazil y Spaña a reporta mortonan relaciona cu Monkeypox diasabra.

Den e careda pa adkiri vacuna di Monkeypox, expertonan ta mirando un ripiticion di COVID-19. Varios pais di mas recurso ta cumprando cantidadnan grandi di vacuna pa Monekypox, mientras cu nan ta nenga di comparti dosis cu Africa, acto cu por laga miyones di persona sin proteccion contra di un version hopi mas peligroso di e malesa, y ta core riesgo cu mas infeccion di bestia pa humano lo tuma luga, segun advertencia di oficialnan di salud.

Nan ta preocupa cu lo mira un ripiticion di e problemanan di falta di igualdad catastrofico cu a mira durante e pandemia di coronavirus.

“E erornan cu nos a mira durante e pandemia di COVID-19 ya caba ta ser ripiti,” Dr. Boghuma Kabisen Titanji, un profesor asistente di medicina na Emory University a bisa.

Mientras cu e paisnan di mas recurso a pidi miyones di vacuna pa para Monkeypox na nan frontera, ningun a anuncia plan di comparti dosis cu Africa, unda un version mas letal di Monkeypox ta plamanto compara cu otro paisnan.

“E paisnan Africano cu tin decada ta lucha contra di Monkeypox ta ser laga atras den e respuesta global,” Titanji a bisa.

Cientificonan tabisa cu diferente na e campañanan di COVID-19, vacunacion contra Monkeypox en masse no lo ta necesario. Nan ta kere cu e uso di dosisnan disponibel specifico, conhuntamente cu otro medidanan lo por combati e epidemianan aki.

Mientras Monkeypox ta teniendo mas dificultad pa plama compara cu COVID-19, expertonan ta adverti cu si e malesa cuminsa plama den poblacion general, e necesidad pa vacunanan por bira mas intenso, specialmente si e virus drenta regionnan nobo.

Riba diahuebs, Africa Centers for Disease Control and Prevention a haci yamado pa e continente keda prioridad pa ricibi vacuna, bisando cu un biaha mas nan ta ser laga atras.

“Si nos no ta sigur, e resto di e mundo tampoco no ta sigur,’ Africa su director di CDC Ahmed Ogwell a declara.

Aunke Monkeypox tin tempo caba siendo un endemia den cierto partinan di Africa, mayoria biaha esaki ta bula den hende for di bestianan infecta, y tipicamente no ta plama mucho leu for di e continente.

LEAVE A REPLY

Please enter your comment!
Please enter your name here