Relaciona cu un comentario recien den medionan di comunicacion di taxistanan tocante trafico na waf, director di DOW, Marlon Croes ta aclaria e situacion den e siguiente comunicado di prensa.
Den cuadro di e trabounan tumando luga dilanti di Welcome Plaza, director di DOW, Marlon Croes a splica cu Welcome Plaza inicialmente a wordo diseña bou di DOW su guia y a wordo ehecuta y supervisa bou di DOW tambe. Durante cu el a wordo habri, Cuerpo Policial, Aruba Ports Authority (APA) y Departamento di Transporte Publico (DTP) a bin constata cu tin hopi trafico cu ta ‘by-pass’ e fila cu ta core durante entrada y salida di waf, creando un problema di siguridad pa turistanan cu ta cana den e area aki y tur persona cu ta haci uzo di e parke aki.
Como consecuencia di esaki, un reunion a wordo yama cu envolvimento di un grupo di diferente stakeholder, manera Cuerpo Policial, DTP, DOW y APA. Den e reunion aki a trata kico por ta posibel solucionnan pa por soluciona e problema aki. Cada grupo den nan seno a pensa con y kico por haci for di cual a sali diferente alternativa. E grupo a keda pendiente pa reuni un bes mas pa e decision final wordo tuma riba kico lo wordo haci.
Ponencianan taxista sra. Orman ta incorecto.
Pues ta importante pa accentua cu te na e momentonan aki, ni DOW y tampoco Ministerio bou di cual DOW ta resorta no a duna ningun ‘opdracht’ pa loke ta e decision, esaki no lo por tuma luga tampoco. E decision lo wordo tuma den e reunion menciona cu e stakeholders envolvi, cual ta pendiente. Pues e ponencianan treci dilanti den medionan di comunicacion ta incorecto y ta contradictorio si mira locual cu realmente e grupo di trabou ta haciendo.
Finalmente, sr. Croes ta lamenta cu informacion incorecto ta keda distribui, pa cual ta recomenda cada persona pa busca informacion for di fuentenan confiabel cu conocemento riba e tema, pa evita cu ta mal informa comunidad.
