E canciyer Irani Mohammad Javad Zarif, a yega na Nicaragua diadomingo pasa den un bishita oficial, segun fuentenan di e gobierno Nicaragueño. Na su yegada te aeropuerto internacional Augusto Sandino, Zarif a ser ricibi pa su homologo local, Denis Moncada, y Laureano Ortega, yiu homber di e presidente Daniel Ortega. Su agenda di bishita no tabata conoci pa prensa, aunke tin planea cu lo sostene reunionnan cu Ortega y otro funcionarionan di su regimen.

Presidencia a cancela un conferencia di prensa di Zarif cu tabata programa pa ayera dialuna cu medionan internacional pa via di “un agenda ocupa”, segun un comunicado. Prome cu el a yega na Nicaragua, Zarif a participa den un reunion riba e Movemento di Paisnan no Alinea na Venezuela.

E diplomatico Irani a yega na e pais dos dia despues di e festivo di e cuarenta aniversario di e revolucion Sandinista mientras su pais ta atravesa un crisis pa motibo di e retencion di un barco petrolero di bandera Britanico na e estrecho di Ormuz.

Tambe e republica Islamico ta enfrenta tension cu Merca, despues cu e presidente Donald Trump a dicidi na 2018 di retira e acuerdo internacional riba e programa nuclear Irani, cu a ser firma na 2015. E escala di e paisnan a yega te nan nivel maximo na juni, ora Iran a tumba un drone Mericano, cu segun Teheran tabata den su espacio aereo.

Mientrastanto, Nicaragua ta biba un crisis politico pa via di e protestanan cu a cuminsa na april di 2018 y cu organismo di derechonan humano ta calcula cu a laga mas di 300 morto, 2000 persona herido y 62.500 persona na exilio.

 

LEAVE A REPLY

Please enter your comment!
Please enter your name here