Centenares di persona a manifesta diadomingo pasa na Santiago contra e politica migratorio di gobierno, nan a exigi pa caba cu racismo institucional y nan a denuncia e situacion dificil cu e comunidad migrante ta biba, specialmente esun cu ta para na frontera cu Peru.

‘Nos ta inmigrante, no delincuente’, tabata un di e frase mas ripiti durante e marcha pacifico cu a tuma luga diadomingo pasa den e centro di Santiago y cu a desaroya sin incidente.

Diferente organisacion social a yama e mobilisacion durante e siman, den contesta di e ceramento di e Proceso di Regularisacion Extraordinario cu a ser promovi pa e gobierno Chileno, cu tin e obheto di legalisa e estadia di 300.000 inmigrante di varios pais cu ta biba na e pais.

E coordinador nacional di inmigrante ta haya e iniciativa, cual a keda aproba aña pasa, un fracaso, pa via cu e cifra di e personanan cu nan a legalisa no ta alcansa e mita di loke nan a premira.

Aunke e mayoria di nan ta cumpli cu e rekisitonan exigi, nan a continua cu e cantidad di hende rechasa sin un claro rason. Sinembargo, diabierna pasa e hefe di Departamento di Stranhero y Migracion, Álvaro Ballolio, a anuncia e decision di Ehecutivo di amplia e plaso pa 90 dia mas, te 22 di october, pa e 10.000 persona cu ainda ta warda pa regula nan visa.

Nan a haci enfatisa e situacion di crisis humanitario cu e frontera entre Chile y Peru a biba den e ultimo luna aki, ora centenares di migrante, principalmente Venezolanonan, ta instala riba caya den espera di por drenta e pais.

 

LEAVE A REPLY

Please enter your comment!
Please enter your name here