Cinco religioso acusa di kima un muhe campesino den un hoguera durante un ritual na Nicaragua, a ser condena na 36 aña di prizon, pa un hues na Managua – Nicaragua.
E titular di husgado di distrito penal di huicio di Managua, Alfredo Silva Chamorro a duna un condena na e pastor evangelico, Juan Gregorio Rocha Romero, di 23 aña. Segun fiscalia, el a planifica e asesinato di Vilma Trujillo Garcia, un muhe campesino di 25 aña na luna di februari cu a pasa.
Mesun condena ta conta pa tur colaborador di Rocha, entre nan Esmeyda del Socorro Orozco Téllez, di 25 aña; Tomasa Rocha Romero, di 24; Franklin Jarquín Hernández, di 28, y Pedro José Rocha Romero, di 26 aña, tur di nan ta miembro di e iglesia ‘Vision Celestial’, supuestamente asocia cu un iglesia evangelico.
E hues a pone un pena mayor di 30 aña pa acusacion di asesinato y 6 aña pa secuestro simpel, cu excepcion di Esneyda Orozco, cu a ser declara inocente di e delito di secuestro simpel.
A pesar cu nan a haya condena largo di 36 aña, nan lo sinta 30 aña solamente, pasobra 30 aña ta e castigo maximo cu un acusado por sinta na Nicaragua. Siman cu a pasa e grupo di religioso a ser declara culpabel di causa e fayecimento di e muhe campesino na februari, ora cu nan a lansa e muhe den candela durante un ritual, caminda nan tabata purba di saca demonio di su curpa. E suceso a tuma lugar na comunidad di El Carrizal, municipio Rosita, na Caribe norte di Nicaragua.
Segun fiscalia e victima a pasa 4 ora dilanti di e candela dia 21 di februari, desde 1 or te 5 or. E tabata mara na man y pia, y pega na un palo, contra su boluntad.
