Represion di e movemento opositor na Nicaragua a causa cu 70.000 persona a sali den exilio, ademas di e 300 morto y 2.000 persona herido cu a registra, segun Organisacion di Nacionnan Uni (ONU) a bisa ayera y tambe a denuncia cu aunke e gobierno ta bisa cu tur detenido a keda libera, ainda ochenta ta den prizon, segun algun fuente a sigura.

E detencion di e personanan aki ta ‘duro’, e Alto Comisionado adhunto pa Derechonan Humano, Kate Gilmore, a sostene durante un exposicion riba e situacion di Nicaragua na e Conseho di Derechonan Humano di ONU na Ginebra.

Na representacion di e Alto Comisionado Michelle Bachelet, Gilmore tambe a duna cuenta di hopi denuncia di tortura cu e ciudadanonan deteni ta sufri pa motibo di nan participacion den e protestanan contra e gobierno di Presidente Daniel Ortega, cu a cuminsa na april di aña pasa y ainda ta sigui, aunke cu menos intensidad.

E tortura y mal trato ta atribui pa forsa di siguridad publico y gruponan arma gubernamental, algo cu gobierno di Nicaragua a nenga varios biaha.

Di e detenidonan na e protesta, 442 a keda liber desde februari pasa, 336 cu medida alternativo di prizon, cu locual ta cay riba nan e menasa di bolbe prizon.

Otro 106 a ser beneficia di un Ley di Amnistia aproba luna pasa, pero organismonan specialisa a critica esaki, entre nan e oficina di Bachelet.

E delegacion di Argentina, den representacion di varios pais di Latino America cu ta critica Ortega, a sostene cu ‘e casonan contra hopi di e manifestante ainda no a keda archiva’ y a pidi ‘e incondicional y definitivo liberacion di tur persona cu a detene arbitrariamente’.

 

 

 

LEAVE A REPLY

Please enter your comment!
Please enter your name here