Venezuela lo purba di re restructura su debe externo cu ta balora na 150.000 miyon dollar. E situacion ta un proceso compleho, pa e situacion economico cu Venezuela ta bibando awor.
“Mi ta decreta un refinanciamento y un restructuracion di e debe externo y tur pago di Venezuela,” Maduro a splica ora cu el a bisa cu ayera (diabierna), paga 1.121 miyon dollar pa cubri e pago di e bono 2017 cu PDVSA tin.
Maduro a recorda cu a haci e pago diahuebs, y cu esaki ta un siman despues cu gobierno a paga 842 miyon dollar, pa cancelacion parcial di e bono PDVSA 2020.
“Nan no lo asfixia nos y hamas nos lo rendi, pa imperio Mericano ni ningun otro imperio,” el a bisa ora cu e tabata papia tocante sancion di Merca. Den un ambiente di sancion, e restructuracion no ta posibel.
Presidente di Venezuela a bisa cu el a nombra un comision, di cual e vice-presidente Tareck El Aissami ta presidente, pa cuminsa cu un refinanciamento y restructuracion di tur debe cu Venezuela tin. “Nos intencion ta pa sigui cumpli, pero cu e persecucion financiero di e banco y organismonan internacional contra Venezuela mester termina,” el a subraya.
E comunicado di Maduro ta pone un fin na un politica di pago na tur costo, manteni desde gobierno di Hugo Chavez. Desde aña 2014, e pais cu mas reserva di petroleo na mundo, a cancela 71.700 miyon dollar na capital y interes di debe, presidente a splica.
Despues di e pago di e bono di 2017, Venezuela mester paga como 1800 miyon dollar di interes di otro papel di valor, segun compania Aristimuño Herrera & Asociados.
Aunke awor ta pendiente e pago di interes di otro bono cu mester a paga na luna di october ultimo, tin tempo ainda, ya cu esakinan tin un periodo di gracia di 30 dia.
