ORANJESTAD – E riesgo pa un persona por a resulta contagia cu e virus di sarampi durante su bishita na e barco Freewinds ta masha limita.

Te ainda no a wordo raporta oficialmente niun caso di sarampi, ni prome ni despues cu a wordo conoci e suceso di e barco menciona. Sarampi a wordo eradica varios decada pasa na Aruba, danki na e campaña di vacunacion regular cu ta tuma luga riba nos isla.

Sinembargo, departamento di Salud Publico (DVG) a adopta tur medida preventivo for di cu a keda constata cu un miembro di e tripulacion di e barco, y no un turista, a bin cu e virus for di Europa, sin cu e tabata sa. Pero durante e periodo di incubacion di e virus, e malesa a wordo manifesta abordo di e barco na Aruba.

E seccion medico di e barco a tuma tur medida preventivo, y nan a isola di biaha e pashent. E tabata un bon medida, ya cu te ainda no a wordo registra mas caso. Asina a keda relata durante un entrevista cu Bon Dia Aruba a sostene cu e microbiologo, Dr. Wilmer Salazar y tambe cu promotor di salud, Jurette Croes, ambos na servicio di departamento di salubridad publico (DVG).

“Nos por bisa cu si no tabatin mas caso of manifestacion di e virus, ami ta kere cu e caso ey ta keda te eynan,” segun Salazar.

Situacion
Igualmente, e barco aki pa añanan a haci di Aruba su hub, unda nan ta realisa actividad pa recauda fondo na beneficio di fundacionnan y instancianan social di Aruba. Semper nan tin un registro di esunnan cu ta bishita e barco pa disfruta di nan conciertonan y eventonan caritativo. Mayoria di hende cu a wordo entrevista, nan tabata vacuna y nan no tabatin mucho contacto cu e tripulacion.

Segun Croes, e barco aki cu ta frecuenta nos isla. Dia 20 di april tabatin un karaoke y dia 27 di april tabatin un concierto. Aunke indicacion ta mustra cu e chens cu un di e bishitante por a resulta infecta cu e virus di sarampi ta uno minimo, toch DVG ta haci un yamado di forma preventivo pa tur e hendenan cu a frecuenta e barco riba e periodo indica.

E intencion ta pa haci diferente pregunta na e persona, y asina evalua si eventualmente ta contagia. DVG a haya un registro for di e barco di tur e personanan cu a bishita e crucero aki. DVG ta yamando e personanan aki individualmente, pero pa haci e trabou mas eficiente, nan a pidi pa e hendenan mes tuma contact cu e seccion di Malesa Contagioso di DVG. Nan ta hayando un par di yamada, pero esunnan cu no a yama ainda, e departamento aki lo tuma contact cu nan.

Tambe Croes ta conseha cu e personanan cu ta bay di biahe na un pais cu tin sarampi, ya cu tin brote na diferente caminda, pa check si bo ta vacuna. Den caso cu bo no ta vacuna, bo por busca esaki na DVG su seccion di malesa contagioso. Si na momento di regresa na Aruba, bo ta ripara cu bo curpa no ta bon, ya sea cu bon tin keintura y bo wowonan ta cora, etc., ta importante pa tuma contact cu bo dokter di cas via telefon. Asina bo por evita cu si e ta un caso di sarampi mes, nan lo por tene esaki isola y preveni cu e no por plama su mes.

Sintomanan
Ta asina cu DVG a haci varios anuncio pa esunnan cu a bishita e barco crucero entre 14 pa 29 di april ultimo, durante dos actividad cu a wordo realisa abordo di e barco aki, pa raporta nan mes na seccion di Malesa Contagioso. Principalmente si nan ta presenta cierto sintomanan, manera tosamento, wowonan ta pica of bira cora y basha awa, nanishi ta core, rash y keintura. E sintomanan aki mester manifesta nan mes prome cu dia 21 di mei awor. Nan ta e dianan cu supuestamente e virus mester a manifesta su mes cerca esun cu a bishita e barco den e temporada indica.

No mester subestima niun di e sintomanan, ya cu e por parce na otro tipo di malesanan manera dengue, influenza y otro malesanan cu ta causa rash y keintura. Salazar a aclaria cu no tin sintomanan exclusivo cu bo por bisa cu ta identifica sarampi riba su mes. Solamente cu prome ta aparece rash, y dos dia prome ta aparece cierto lesion den boca, cu por duna un indicacion cu ta sarampi.

Salazar a bisa cu e periodo di incubacion di e virus ta depende di e periodo cu e persona por tabatin contacto cu e virus. Nan a bin cu e periodo entre 14 pa 29 di april, ya cu DVG a wordo informa cu dia 22 di april e tripulante di e barco a manifesta e rash. Na momento cu e rash ta wordo manifesta, nan ta conta 4 dia prome y 4 dia despues, ya cu esey ta e periodo di infeccion. Despues, cualkier riesgo di infeccion no ta factibel. Nan mester warda ainda dos pa tres siman pa wak si lo por tin casonan.

Risiconan
E situacion aki no mester ta uno di panico, sino di prevencion. Te hasta esunnan cu ta frecuenta e barco aki por sigui disfruta di nan actividad, y por sinti nan mes safe y confia pa sigui bishit’e. Aunke e virus di sarampi ta hopi contagioso, e no ta un virus resistente. “E virus ta hopi labiel,” Salazar a bisa.

E virus tin un periodo di bida breve. E drop cu por tin e virus ta keda elimina ora cu e ta seca. Salazar ta sigur cu e barco a tuma tur medida di prevencion di higiena y desinfeccion pa e barco ta safe di e virus. Tambe DVG lo exigi di e barco si nan a adopta tur medida di desinfeccion. Nan tin full un maneho, y DVG ta check si nan a tuma tur e medidanan di acuerdo cu e protocol of regulacion internacional.

Brote di sarampi
E situacion actual di brote internacional di sarampi ta debi na e cantidad di migrantenan cu ta bin for di paisnan cu no tin un programa di vacunacion stricto y regular. Sinembargo, na Merca y paisnan Europeo, e virus di sarampi a surgi bek, ya cu e tabata un virus cu a wordo eradica añanan atras, y nan a descuida y no a sigui cu nan campaña di prevencion.

Otro problema tin di haber cu e hendenan cu ta skeptico riba uzo di vacuna. Aunke e ta e derecho di cada hende, pero el a bira un problema cu ta concerni na salubridad publico. Segun Salazar, e ta un accion cu nan no mester tuma, ya cu e vacuna ta un proteccion y e ta ‘evita bo un mal innecesario’.

Si tin hendenan skeptico riba uzo di vacuna, el a laga sa cu ta existi estudionan cientifico cu ta mustra cu ta mas beneficioso uza vacuna cu bo keda vulnerabel na cualkier virus of malesa. Den e caso di sarampi, un vacuna y dos dosis di dje, ta suficiente pa duna bo e proteccion pa henter bo bida. Esey ta e mensahe cu semper nan ta hiba: Persona cu no ta vacuna, y muchanan cu no ta vacuna, tuma contact cu DVG pa nan haya nan proteccion.