Experto y oficialnan di salud ainda ta confundi pa un malesa misterioso cu a laga mas di 500 hospitalisa y un persona morto den estado di Andhra Pradesh.
A detecta e malesa pa prome biaha diasabra nochi na Eluru, un ciudad antiguo famoso pa su productonan traha na man. Hende a cuminsa convulsiona sin advertencia, segun Geeta Prasadini, director di salubridad publico.
Desde e tempo ey, sintomanan variando for di nausea y ansiedad te na perdida di tino a keda reporta den 546 pashent admiti den hospital. Hopi a recupera y bolbe cas, mientras 148 ainda ta ricibiendo tratamento, segun Dasari Nagarjuna, vocero di gobierno.
Team di experto a yega e ciudad for di e institutonan cientifico top di India. A sugeri y ta test varios teoria. E hipotesis mas reciente ta contaminacion di cuminda cu pesticida. “Pero niun hende sa”, Prasadini a admiti.
Loke tin expertonan confundi ta cu no ta parce di tin un vinculo comun entre e centenares di persona cu a bira malo. Tur pashent a test negativo pa Covid-19 y otro malesa viral manera dengue, chikungunya of herpes. Nan no ta famia di otro. Nan no ta biba den mesun area. Nan ta di diferente grupo di edad, incluyendo 70 mucha, pero masha tiki ta di edad avansa.
Inicialmente a sospecha awa contamina. Pero oficina di minister a confirma cu hende cu no ta usa e suministro di awa municipal tambe a bida malo, y cu test inicial di muetranan di awa no a revela ningun kimico dañino.
Un homber di 45 aña di edad cu e nomber unico di Sridhar a ser hospitalisa cu sintomanan similar na epilepsia y a fayece diadomingo anochi, segun dokternan. Prasadini a bisa cu su autopsia no a revela nada riba e causa di morto.
E hipotesis cu actualmente ta test ta cu hende a come berdura mancha cu pesticida traha di componentenan organico conteniendo fosforo. Pero esaki ta un ‘asuncion’ basa riba e hecho cu pesticidanan asina ta comunmente usa den e area, y no riba ningun evidencia, Prasadini a aclaria. El a bisa cu expertonan tabata test pa mira si pesticidanan a contamina pisca of pasa riba otro berdura.
Lider di oposicion N. Chandrababu Naidu, a exigi riba Twitter pa haci un ‘investigacion imparcial y amplio riba e incidente’.
Estado Andhra Pradesh ta entre esnan mas afecta pa Covid-19, cu mas di 800mil caso detecta. E sistema di salud na e estado, igual na resto di India, a keda golpia pa e virus.
