(CuraçaoChronicle) – No a permiti pasaheronan abordo di crucero Odyssey of the Seas desembarca na Corsou. E porcentahe di persona infecta cu coronavirus abordo tabata demasiado halto. Pa e motibo aki, departamento di Salud no a permiti pa e barco mara.
Compania di crucero di e Odyssey of the Seas, Royal Caribbean International, a yega na Corsou ayera mainta. Na momento cu a resulta cu mas di un porciento di e miembronan di tripulacion tabata infecta cu coronavirus, epidemiologo Dr. Izzy Gerstenbluth a prohibi e pasaheronan di desembarca.
“E dia prome cu ayera, 18 miembro di tripulacion a test positivo, ayera 36 y awe mainta (diahuebs) tabatin 51. Ademas, varios miembro di tripulacion no a bay den cuarentena, pues tin un bon chens cu e pasaheronan tambe a keda infecta”, Gerstenbluth a bisa.
Segun e epidemiologo, tin un protocol cu ta stipula cu un porciento di e cantidad di hende riba e barco por ta infecta cu coronavirus. “Cu e cifranan aki di infeccion, a excede e porcentahe y pa e motibo aki nos no ta dispuesto pa ricibi e hendenan aki riba e isla, specialmente no cu e cifranan actual riba e isla”, Gerstenbluth a bisa.
E barco tin Aruba programa pa awe. Managing director di Aruba Ports Authority, Mark Figaroa, a indica cu no ta permiti pa e barco drenta Aruba. Unda ta e proximo destino di e barco ainda no a keda conoci.
