Den Bon Dia Aruba su investigacion pa por a yega na altura si tin mucha menor di edad trahando nos a comunica cu Departamento di Asuntonan Social pa splica nos di esaki.
Rond di Aruba nos ta wak muchanan den edad di 13 aña en adelante ta yena saco den supermercado of haci cualkier tipo di trabou cu tin. Claro nos no sa ki ta e motibo cual nan ta trahando; sea e ta haci esaki pa yuda na cas of pa beneficio di su mes.
Vocero den e temanan aki Sacha Geerman a splica nos tocante esaki. ‘No tin kinderarbeid na Aruba,’ asina e la cuminsa splica.
“Caso cu nos a yega di wak cu a pasa ta cu tin famianan tin gasto manera di cas, auto, combustibel anto claro e gasto nan ta mas halto cu e salario di e mayornan. Nan ta wak nan mes den un situacion preta anto e yiu ta bay yuda e famia haciendo trabou den supermercado. Cu e placa ey ta cumpra sea cuminda of otro necesidad cu tin den e cas.
Claro esaki no kiermen cu e ta obligacion di mucha, un mucha den su hubentud por traha pa su beneficionan; material of cosnan cu e mucha mes tin gusto di cumpra pa su mes. Nos di Sociale Zaken lo purba conseha e famia, mama of tata, puntra cua ta e situacion di e cas, e motibo cual e mucha ta trahando. Si ta pa yuda e famia, nos ta wak si e ta obliga pa traha of djis pa yuda den cierto momento. Ban bisa un mayor kier un auto di luho anto no por pa motibo di salario pero toch ta cumpra. Pa e motibo ey e situacion ta cuminsa bira preta, e mucha of e hoben tin cu traha pa yuda den situacion. Nos ta purba papia cu e famia pa wak bon y cumpra un auto menos costoso of sea locual cu mester pa baha mas e gastonan y mehora esaki.” Sra. Geerman ta sigui splica cu mester ta consciente di e gastonan cu e cas tin.
“Nos no ta den contra di esey (pa un mucha yuda financieramente na cas) pero mester wak bon cu esey no ta cay bou responsabilidad di e mucha of hoben. E no ta un obligacion pa traha. Awo si ta un famia di menos recurso anto ta ripara cu tin necesidad di berdad den e cas, e ora ey si claro e por yuda den yena saco den supermercado of cualkier tipo di trabou cu no ta pisa of pone e hoben/mucha den peliger.”
Sra. Geerman ta splic cu casonan asina nan a yega di experencia pero no casonan cu ‘a bay for di man’.
“Pero Aruba nos no tin casonan asina manera otro pais rond mundo”, sra. Geerman a splica.
Di locual cu Bon Dia Aruba por a conclui te na e momento aki ta cu segun registro di instancianan oficial, no ta conoci na Aruba cu tin mucha menor di edad of hobennan cu ta wordo exploita of forsa pa bay traha na cierto luganan.
