producto venci y control 1.jpg

Consumidor ta hopi vulnerabel riba e peliger di consumi productonan manipula  y/of productonan cu a vence for di mercado. Recientemente a wordo registra un echo criminal caminda un persona a manipula un bebida poniendo veneno den un juice, locual a ocasiona cu varios persona a resulta malo.

Pero di otro banda ta existi e problema cu doñonan di negoshi ta bende productonan cu a vence of casi nan ta cla pa caduca na un prijs mas barata cu ta un peliger pa salud di hende. Nan ta bende nan sin problema riba shelf nan, y te hasta tin algun di nan cu conscientemente ta scrap e fecha di vencemento for di e productonan.  E problema aki ta bira mas evidente den e periodo di fin di aña. Pero tin control pa nan?

Departamento pa consumidor
Luciano  Maduro di Bureau Huur-en Consumenten Zaken a bisa cu riba e parti di vencemento di producto,  nan departamento no ta haci un control riba e productonan cu ta vence.  E ta indica cu e autoridad riba esaki  ta departamento di Salud Publico su seccion di Inspeccion  y Higiena, caminda nan tin un bon canal di comunicacion.

Por cierto e ta haci un yamada pa consumidor ta alerta ora di cumpra y/of consumi berdura, ya cu nan a haya un keho recien di un paki di spinashi cu tabatin bichi den dje. Nan a pone na altura departamento di Salud no solamente pa bay check e supermercado sino pa dobel check for di unda e spinashi ta bin. Asina nan por check cerca e cunukero si e proceso ta sosode segun nos normanan y ley di higiena. Nos tin berduranan, specialmente berdura local cu tin biaha e consumidor mester ta alerta. Specificamente den e temporada aki di hopi cushinamento, sr. Maduro ta bisa.

Autoridad pa kita for di shelf
Den caso cu un consumidor ta raporta algun iregularidad cu fecha venci den supermercado of negoshi, Bureau Huur-en Consumenten Zaken ta tuma contacto cu e departamento concerni pa nan por kita nan for di  shelf nan, ya cu nan  tin e autoridad pa haci esey.

Practicamente  e control ta bin ora cu e consumidor ta haya un iregularidad y ta bati e bel. P’esey segun sr. Maduro , nan ta solicita pa e consumidornan ta alerta pa dobel check e fecha di vencemento di productonan, specialmente den e tempo awor. “ E departamento di gobierno den realidad ta esunnan cu lo mester controla esaki, pero si e consumido yuda  den e proceso, e ta hacie mas efectivo.”

Fundacion  Consumidor Arubano Solidario (CAS) cu actualmente ta den proceso di busca mas miembronan den  nan directiva, tambe tin su rol riba e parti di control. CAS su tarea ta mucho mas amplio cu esun di Bureau Huur-en Consumenten Zaken. CAS no solamente ta defende interes y derecho di consumido den e sentido mas amplio, locual ta inclui un tarea di control cu nan a yega di realisa den pasado. Pero actualmente nos no ta tende mas di nan.

Departamento di Higiena
Bon Dia Aruba a acerca Yvette Geerman directora di Dienst Warenkeuring en Hygiene. E ta referi e caso di e juice cu e veneno di djaca. E ta bisa cu nan no a wordo envolvi directamente, ya cu el a bira un caso mas hudicial.  Despues cu a haci investigacion nan a nota cu e manipulacion di e producto nan a haci intencional.  

Pa Dienst Warenkeuring en Hygiene un punto importante ta e parti con e negoshinan ta warda nan productonan. Sra. Geerman ta bisa cu e aspecto aki ta importante, ya cu por existi posibilidad cu un producto venenoso ta wordo warda cerca di un producto di consumo normal, sin tene cuenta cu cierto factor di riesgo di contaminacion. 

Control
Bon Dia Aruba a puntr’e riba e parti di control y si esaki ta sosode regularmente. Sra. Geerman a bisa cu na momento cu nan ta haci nan inspeccion, nan ta controla specialmente riba  supermercado, pero tambe restaurantnan, si e productonan cu nan uza  no ta venci. E ta keda frecuente e fenomeno di  productonan venci cu ta wordo haci uzo di dje of cu nan ta riba mercado. Na  momento cu nan ta controla nan ta hay’e, pero despues nan ta keda haya nan bek, pues e comerciantenan aki  no ta siña.

Pa Dienst Warenkeuring en Hygiene ta hopi importante den nan control riba supermercadonan; nan control riba  nan depositonan.”Fuera cu nan mester ta limpi y na ordo, algo importante ta con nan ta warda nan productonan .”

E mesun regla aki ta wordo aplica den cushina di restaurant, unda no mag di tin nada kimico, ora cu nan ta cushina. “Eynan e cosnan por bay robes cu lo por tin un situacion fatal.”

Falta di instrumento legal
Encuanto e problema di control riba fecha di vencemento e ta keda un punto di atencion cerca nan.  Tin casonan cu nan ta ripara cu e supermercadonan ta keda cu hopi producto venci riba  shelf nan, y eynan e problema ta sinta. Segun  sra. Geerman no ta hancra den ley ainda  cu nan por actua strictamente contra e tipo di productonan venci.  A pesar di e buraco aki den nos legislacion,  nan ta realisa trabou di control. Pero den transcurso di aña venidero nan kier pa bin un maneho mas stricto riba e tereno aki y nan lo sigui traha riba e concepto di ley aki. “E ta un punto di atencion cerca nos. E ley tin hopi buraco ainda. Ainda e no ta concretisa.”

Nan ta realisa control y na momento cu nan ta detecta cu un producto su fecha a vence, e no mester ta riba shelf nan, nan meter kita nan y nan mester wordo destrui. “Tin un motibo pakico un fecha ta riba un producto. E ta duna bo e garantia na e momento ey cu e producto ta di un calidad pa un consumo humano”,  sra. Geerman ta indica.

Na final e ta laga sa cu como departamento nan ta acerca nos comunidad y muy specialmente den e temporada aki di hopi consumo, pa bira hopi critico. Ora bo ta cumpra un producto  bo mester mira kico bo ta cumpra: Wak bo producto bon, wak su fecha di vencemento,  wak con e pakete su estado ta, wak si e bleki no ta frustia, si e ta den mal estado no cumpr’e pasobra como consumidor bo ta pagando p’e.