Cosnan importante ta tumando lugar den e dianan aki, y no solamente riba tereno di negociacion cu Hulanda. Nos ta den un fase di peligro extremo pa loke ta e situacion di Covid-19, cu ta exigi cu mester bin un maximo claridad kico ta bay sucede, cual ta e pasonan cu ta bay tuma, pasobra nos no ta mira mehoracion den e asunto aki, al contrario.

Den e edicion aki por mira den informacion cu nos ta brinda cu den ultimo siman aki e nivel riba su mes grave caba di mas di 1200 caso activo di Covid-19 a subi te na un nivel di mas di 1400, buscando 1500 caso activo den nos comunidad. Kico esey ta trece cune? Cu e situacion critico na Hospital por bira hopi mas grave ainda, te na un punto cu nan no por wanta e presion di trabao mas. Como agravante nos por observa cu nos sistema ta traha asina malo caba, cu tin caso di fayecimento cu a tuma lugar na cas, sin cu tabatin un seguimiento adecua di banda di nos sistema medico; otro señal cu nos sistema a cuminza faya caba, cu consecuencia mortal. Si nos no ta remedia y controla e situacion, anto pronto e fenomeno aki ta bira mas general, unda mas hende ta fayece sin por yega na Hospital, mucho menos na ICU pasobra e capacidad ey ta limita.

Sin embargo, nos no a mira mucho accion te awor di banda di e team di crisis, en todo caso no publicamente. Si tabatin movimento den silencio, manera e carta cu gobierno a manda pa e departamento y servicionan gubernamental pa libra personal pa apoya DVG y e crisisteam den nan trabao. Esey ta mustra un bon medida, pero lamentablemente e ta bin varios siman laat; ta pasonan cu mester a tuma caba na momento cu tabatin sentido ainda pa bay haci ‘contact tracing’. Si awor ainda bo kier bay haci esey, unda bo ta cuminza? Nos ta kere cu a haci un trabao pober di acompaña y controla e personanan cu a test positivo, con nan situacion na cas ta, di berdad nan por isola nan mes di resto di famia? No lubida cu no ta tur hende na Aruba tin un cas cu varios dormitorio y baño, pa por set up un isolacion cu ta ‘make sense’. Pakico no a pensa riba otro alternativa, pa por tin control, manera un lugar di cuarentena? Si awor ainda kier bay core tras di tur caso, e trabao ta gigantesco sin garantia di exito, pasobra bo ta depende di un grupo grandi di hende, funcionario publico cu no ta custumbra di haci e trabao aki. Enfin, ban spera cu algo bon sali di esaki, aunke nos no ta kere cu por resolve e situacion aki sin tuma mas medida. Y a pesar cu hopi hende no kier tende di esey, nos a yega na un situacion di un contagio asina general, cu lo mester contempla un lockdown completo. Y ya cu september ta un luna mas keto pa loke ta turismo, si mester bay den un lockdown, talvez ta recomendable haci esey awor y no mas den aña unda por spera mas turista na nos isla. Pero naturalmente e decision ey ta pa esnan designa pa haci esey. Nos ta keda sumamente preocupa si, pasobra di e manera aki cualkier perspectiva pa un recuperacion rapido di nos economia a desaparece caba.

Y cu esey tambe e necesidadnan financiero, pa mantene pan riba mesa pa un gran parti di e poblacion ta bira dia pa dia mas un problema, cu ademas por keda prolonga te leu den otro aña. Ta pesey tambe cu ta completamente incomprensible cu gobierno, sabiendo cu un gran parti di Aruba ta pro pa yega na un areglo cu Hulanda, ta keda insisti den nenga e man cu por yuda nos. Nos ta interesa pa sa kico ta bay haci awor cu Hulanda a bisa bon cla cu no ta papia mas, cu no tin nada di negocia, y ta tuma e proposicion mamera e ta, of no.

A proposito, nos a keda sumamente asombra pa scucha cu ta bay busca un prestamo internacional, despues el a bira un prestamo local pasobra supuestamente e team di PR di nos Promer Ministro lo tabata asina inepto cu nan lo a laga e mandatario papia di un prestamo internacional mientras lo tabata trata di un prestamo local. Realidad ta cu tur dos ta un mal idea. E prestamo internacional mester di aprobacion di gobierno di Reino, y e prestamo local, na florin, ta come malamente den nos reserva di divisa. Den un economia habri manera di nos den poco tempo placa na florin cu bin den circulacion ta ‘end up’ den mercancia o servicio cumpra afor, loke ta sali a costo di divisa. Nos niun mester ta economista pa comprende esey. Loke Aruba mester, y sigur den e situacion den cual nos ta, unda ta parce mas bien cu e ‘curve ta crush nos’ cu lo contrario, ta e solucion cu mayoria di nos ta reconoce den e man cu Hulanda ta brinda nos. Cu ki cara e hendenan aki otro aña, o cualkier momento cu tin eleccion, ta drenta cas di hende unda awor caba no tin pan?

 

LEAVE A REPLY

Please enter your comment!
Please enter your name here