Den prensa Mericano a sali e noticia cu nos autoridad di turismo ATA ta pagando e vakantie di full e team perdedo di Superbowl, Atlanta Falcons. E noticia a drenta un dia despues (ayera) e wega final cual tabata uno sumamente sopresante. Como cu e team Falcons tabata asina hopi dilanti (cu 25 punto) pero sinembargo a perde finalmente di New England Patriots.
Ora e noticia a bira conoci na Aruba, for di mundo di deporte por mira cu tabatin basta critica riba e echo cu ATA ta sponsor un team di afo cu pa colmo a perde e wega. Esaki tambe den e luz, cu hopi club di deporte na Aruba ta faltando placa. Aruba Tourism Authority (ATA) a indica den su relato manda pa prensa Mericano cu nan ta paga 4 dia di ‘sun, sand and smiles’ pa henter e team riba e ‘happiest island in the world’. Ambos team a surpasa obstaculo y traha duro, asina director di ATA, Ronella Tjin Asjoe-Croes, ta bisa den relato. “Nos kier reconoce e Falcons nan dedicacion y perseverancia a pesar di e resultado.”
Den un aclaracion duna na NoticiaCla e director ta bisa cu e ta trata di un ‘PR stunt’ y cu esaki tampoco ta algo nobo como cu na 2012 ya nan a invita e team perdedo tambe. E publicidad a resulta, segun e, como un gran cantidad di fuente internacional a tuma over e noticia. Y di otro banda masha poco e invitadonan ta tuma e oportunidad pa realmente bin pasa vakantie na Aruba.
