Heintje Ras, un bombero Arubiano cu pasion pa cultura Arubano ta mustra su amor pa tur loke tin di haci cu nos cultura, visibel den su bida diario den su propio museo, Museo di Antiguedad ‘Nos Bieunan’.

Desde un edad jong, Heintje a siña con pa drecha mashin di cose. Pues na cualkier momento cu un persona tabatin mester di drecha un mashin, nan lo yam’e. Mientras tabata drecha un mashin di cose kibra na cas algun aña atras, el a mira cu e doñonan di e cas tabatin un mashin di cose hopi bieu benta den cura di cas, y a pidi nan si por hay’e. El a bay cas cu nan, drech’e y for di esaki el a haya e idea pa cuminsa colecciona artefactonan antiguo cu hende kier a benta afo of no tabata kier mas. Pa Heintje, tur e artefactonan aki tin un nificacion special, un balor, nan tur ta conta e storia di nos ancestronan y nos herencia. Ta p’esey e ta purbando di ‘rescata’ tur artefacto cu ta conta un storia di nos pasado.

E coleccion a cuminsa na su garashi na cas. Mas y mas artefacto a keda colecta cu hasta a bira asina yen cu el a cuminsa pone nan den su sala y a continua plama nan rond henter e cas. Asina a haya e idea pa habri su cas pa publico. E necesidad pa educa, specialmente mucha, pero tambe hende di tur edad tocante nos historia y nos ancestronan ta loke a conducie na habri su propio museo na su cas. E ta sinti alegria mirando muchanan interesa den siña e historia di e artefacto, con esaki ta traha, specialmente ya cu muchanan awendia conoce solamente e era digital y tur cos ta facil pa haya. Tambe e ta stima comparti su conocemento di e artefactonan aki y nan nomber original den Papiamento.

Na su museo por haya artefactonan bayendo back na cuminsamento di añanan 1600s. Di mueblenan antiguo, pochi, panchi, instrumento musical, pintura, herment, lampi, mashin di cose y hopi mas. Tin un coleccion di alrededor di mil artefacto. E ta encanta cu henter su coleccion, pero su artefactonan faborito ta un music box cu tabata casi imposibel pa e haya, pero despues di hopi negociacion el a hay’e; y tambe un cash register di mas di 100 aña bieu, cu a dur’e 8 aña pa hay’e den su posesion.

Ainda e tin un soño cu e kier mira bira realidad, esaki ta pa tin un ‘Museo riba Wiel’. Un bus cu tur sorto di artefacto, cual e por core rond e isla y hiba na scolnan y cerca di e turistanan.

E museo di Antiguedad ‘Nos Bieunan’ ta situa na Rooi Master 5E, cerca di Savaneta. Ta rekeri reservacion.

LEAVE A REPLY

Please enter your comment!
Please enter your name here