Premier Evelyn Wever-Croes diahuebs ultimo a duna un discurso nacional pa informa comunidad di e desaroyo financiero di pais Aruba, y e negociacionnan cu Hulanda. 

A pesar cu e negociacionnan cu Hulanda ta bay dificil, y Hulanda ta cambia e condicionnan cada biaha, y a pesar di e desaroyo preocupante di Covid, asina mes Premier Evelyn Wever-Croes a comparti un mensahe di speransa y inspiracion.

“Nos mes por, no laga ningun hende bisa bo cu nos no por. Nos a haci’e den pasado caba y nos lo haci’e atrobe. Y mi ta compronde cu tin gremionan preocupa, y mi lo tene cuenta cu esey y hunto sigui traha riba solucionnan. Pero pa awor, e problema financiero ta soluciona. Garantia cu lo tin placa pa eternidad sin problema, mi no por duna, y mi no por a duna nunca. Pero si mi por duna e compromiso, cu mi lo no permiti nos pais kibra, y mi lo no permiti ningun otro pa kibra nos pais. Mi ta kere cu den e casi 3 añanan cu mi ta dirigiendo nos pais, mi a demostra un actitud responsabel y hopi serio, ora ta trata finanzas. A base di esey mi ta pidi henter comunidad, duna nos e credito y e espacio pa sigui busca e bienestar di nos pais”.

Prome Minister a indica cu tin varios desaroyo interesante nos dilanti. E interes grandi den e refineria y otro desaroyo na San Nicolas. E lesamento di e tankinan San Nicolas. Turistanan sumamente encanta cu nos isla, y un pa un ta invita otro turista pa bin Aruba. E pilar economico di Cannabis medicinal. Tur ta desaroyonan hopi prometedor cu nos tin nos dilanti.

“Nos ta bay reconstrui Aruba bek despues di Covid, como un pais den cual innovacion, resiliencia y integridad ta nos motor, y e determinacion, curashi y amor patria di cada ciudadano lo ta nos forsa. Un Aruba cu un economia mas fuerte y un autonomia a un mas fuerte.

Prome Minister a gradici henter comunidad, pa bo sosten, pa bo palabranan di encurashamento, pa bo oracion, pa bo pasenshi, pa bo confiansa. “Mi kier gradici tur esunnan cu ta traha incansablemente pa yuda nos tanto riba e tereno di e crisis medico, como e crisis financiero. Mi kier gradici nos sector priva, specialmente nos empresanan mediano y chikito, e weso di lomba di nos pais. Na tur ciudadano di nos pais, danki pa a pesar di tur cos, kere den Aruba, y pa duna tur di bo parti pa nos wanta cabes riba awa den e crisis mas severo cu a dal nos pais.

Nos ta bay reconstrui Aruba bek despues di Covid. Mi ta invita bo pa ta parti di e movecion aki. Pero un cos si, awor cu nos a resolve e tema financiero por lo pronto, ban resolve e tema di Covid, cu disciplina y cordialidad. Nos por. Nos a enfrenta retonan grandi den pasado, y nos a surpasa nan, den union. Pues nos a haci’e caba, y nos ta bolbe haci’e”.

LEAVE A REPLY

Please enter your comment!
Please enter your name here