Casi un tercio di nos poblacion ta depende di ayudo alimentario. Y tin hasta mas hende den necesidad cu e grupo cu actualmente ta haya ayudo. Esey ta e saldo na e momento aki. Pero no ta sigur cu cos lo drecha sin bira mas grave promer. Esey no ta culpa di ningun hende, pero ta e consecuencia logico di e sucesonan alrededor di nos, cu ta impedi por lo pronto un reapertura di nos economia. Esey ta implica cu nos mester prepara pa tempo mas dificil ainda, aunke nos tin e seguridad awor cu via e acuerdo nos por conta cu e apoyo necesario Hulandes.

Na nivel empresarial e situacion aki ta completamente comprensible; hopi negoshi tin tanto luna caba den e lucha aki, pero a pesar di e ayudo di salario pa mantene nan payroll, esey no ta nan unico problema, y ta previsible cu den e proximo lunanan mas negoshi ta bay cera. Nan no por afford mas di financia e otro gastonan di nan negoshi, ya cu nan recursonan ta limita. Y den hopi caso bay banco pa fia tampoco ta un opcion pasobra nan no por mustra perspectiva faborable cu lo ta na caminda. E situacion aki por bay causa cu na 2021 por tin casi 40% di nos poblacion den problema di desempleo y por lo tanto sin entrada. Y ademas cu e perspectiva cu den curso di otro aña, ora economia logra cuminza crece atrobe, ainda esey ta trece alivio solamente pa un parti di e miles di persona desemplea. Esaki por significa cu pa varios aña nos por tin un situacion unda un grupo grandi ta keda atras, nan no ta comparti den prosperidad, y esey no ta un cuestion di come so. Si apenas bo tin pan riba mesa, lo ta logico tambe cu no tin placa pa nada otro. Bo ta haya bo ta bende bo auto, si acaso bo tabatin uno. Bo no por cuida bo cas, si bo tin un di bo mes. Si ta huur bo ta huur, bo por perde bo lugar di biba y bo mester busca un solucion cerca famia o conoci. Ora cu e situacion di emergencia dura mas, nos ta cuminza mira e efecto di berdadero pobreza ta surgi cerca nos, cu ta ataca esnan cu no tin nada, di tur banda.

Tur esaki ta obliga nos mira si tin solucion mas structural pa e problema aki. Nos a comprende di e mandatario encarga cu Asunto Social y Labor cu e ta pensando den e direccion aki, entre otro di institucion di un compensacion pa desempleo, loke na Hulanda ta conoci como Werkloosheidswet (WW). Esey ta en principio un posibilidad, pero cu tin su motibonan pakico nunca nos a yega na tin esey na ningun di e islanan. Un promer barera ta cu e ta un servicio social costoso, cu nos ta mira solamente den e paisnan mas prospero, entre nan sigur e paisnan Europeo, entre nan Hulanda. Institucion di e areglo aki ta obliga nos tira un vista promer riba tur cos cu nos a crea caba den ultimo añanan, pa evalua si en berdad na e momento aki, cu e efecto di crisis riba tanto gobierno como sector priva, nos por paga esaki. E argumento di otro banda ta cu ya caba nos ta gastando bastante na apoyo financiero di hende desemplea, tanto via Fase y via bijstand. Esey ta un hecho pero na momento di institui un tipo di WW, si ta segun e modelo cu ta implementa na Hulanda, esaki ta bay via un prima cu e empresanan ta paga. Na Hulanda actualmente e empleado no ta paga un parti di e prima, manera cerca nos ta paga parti di AZV y AOV. Pues ban analisa promer loke nos tin, pa nos sa kico tur esaki ta encera. Nos tin banda di e contribucion di AZV y AOV, tambe e seguro di pension obligatorio pa sector priva, cu ta 6% minimo pa cada empleado, di cual e empresario ta paga minimo 3%. Hunto cu e peso di AZV y AOV, ya caba nos ta mira cu principalmente e empresanan mas chikito y cu menos recurso financiero tin un problema pa cumpli cu e obligacion aki, empeora pa e supervision gubernamental cu no ta existi, te awe. Esaki ta haci cu di tur manera, promer cu via accion gubernamental nos bay pensa den amplia e paquete di beneficio, mester yega na dicidi con nos ta bay haci e areglonan existente viable, promer cu dal e siguiente paso.

Den esaki naturalmente e actual crisis tambe ta hunga un papel, mustrando caba buraco grandi den e fondonan di AZV y AOV. Tarea number un na e momento aki anto ta pa percura pa e dos fondonan aki ta ‘back on safe grounds’, loke no ta bay ta asina facil, mirando cu pa varios aña e diferencia entre entrada y gasto pa e fondonan lo ta considerable. Y e idea pa gobierno libra di e peso di compensa perdida pa AZV y AOV na fin di aña, ta haci cu automaticamente e peso aki ta pasa pa e ciudadano y e empresanan. Esey ta haci cu no sin mas awor aki tin e perspectiva pa por afford un areglo asina, pa deseable cu e por ta.

 

LEAVE A REPLY

Please enter your comment!
Please enter your name here