Sorpresa ta birando algo normal den nos bida politico local. Asina nos por a scucha nos Promer Ministro bisa den su discurso nacional algun dia pasa cu tin negociacion andando ainda cu Hulanda, pero cu esaki ta bayendo den bon ambiente. Esaki banda di su anuncio cu Aruba ta garantiza sosten financiero na empresa y empleadonan den sector priva; por lo menos te cu december tin fondo disponible pa esaki. Despues a bin e noticia di e hermana isla Corsou cu a yega na un acuerdo cu Hulanda encuanto e institucion di un organo di reforma bao di un ley di Reino y e ‘landenpakket’ cu ta encera e diferente reformanan cu mester tuma lugar.

Seguidamente ta drenta e noticia di nos Promer Ministro, cu a yega na un acuerdo similar cu Hulanda un luna pasa caba, pero cu e maniobra di Hulanda pa pone placa disponible pa cinco luna envez di tres, lagando Aruba cu un buraco financiero den presupuesto di gobierno, a daña e asunto. Cu otro palabra, nos no mester ta sorprendi pasobra loke Corsou lo a logra, nos lo tabatin dia bieu caba. OK, lo nos bisa, ban kere cu esaki ta berdad.

Seguidamente un medio digital local ta logra un entrevista cu secretario di estado pa asunto di Reino, Raymond Knops, unda e mandatario ta duna di conoce cu e acuerdo cu Corsou no ta finaliza ainda. Lo tin señal prometedor, pero ‘no tin huma blanco ainda’ pa keda den analogia cu e tradicion Vaticano. E ultimo noticia aki ta causa un poco confusion, pasobra no ta conoci tampoco cual ta e puntonan riba cual tin negociacion andando ainda. Pero, pa nos na Aruba e ta menos un problema, pasobra e puntonan pa delibera ainda, na su debido tempo nos ta haya sa con a para. Mas importante ta e declaracion di nos Promer Ministro, cu sorpresivamente nos lo a keda cla cu Hulanda caba… Y si e punto di conflicto tabata e dos luna di placa cu nos no ta haya mas di Hulanda, esey no ta problema mas pasobra supuestamente gobierno a cubri cu su emision di bono local, cu a resulta den Afl. 171 miyon pa caha di gobierno.

Conclusion: nos a keda cla cu Hulanda? Tur e keho, protesta, preocupacion di diferente gremio, cu tabata pone presion pa gobierno caba di negocia cu Hulanda pa nos tin claridad, a yega na un fin? Ban spera cu esey ta berdad, pero pakico anto nos a keda cu un preocupacion cu e asunto no ta cla ainda? Y pakico, si acaso tin un acuerdo, no a comunica esaki na nos? Si un luna pasa caba por a conta henter comunidad cu tin un acuerdo, lo nos tin un luna caba cu nos por duna perspectiva na henter sector priva, cu te awe ta biba den incertidumbre con aña ta bay caba, y mas grave ainda, con 2021 lo bay cuminza. Si ta asina positivo e negociacionnan tabata un luna pasa, pakico keda keto?

Sin embargo, nos ta kere cu nos mester tuma palabra di Promer Ministro pa berdad. Nos ta contento cu esey, pasobra e ta significa cu e problemanan grandi den e negociacion a keda regla. Manera un di e puntonan clave, cu no ta conta pa Corsou ni Sint Maarten, cu ta e supervision financiero. Si tin un acuerdo, esaki ta implica cu gobierno di Aruba a pone su disgusto un banda, pa bay di acuerdo cu introduccion di un ley di supervision financiero di Reino, cu ta bin na e lugar di e ley di supervision local, cu a keda malogra y descuartiza pa parlamento di Aruba aña pasa. For di fuente fidedigno Hulandes, redaccion di Bon Dia Aruba a comprende cu e introduccion di un ley nobo di supervision financiero local ta ‘onbespreekbaar’ tumando na cuenta e mal experiencia cu Hulanda a pasa aden despues di firma un protocol cu gobierno di Aruba, pa despues henter e asunto keda malogra den parlamento. Tin un motibo mas pa trece e punto aki dilanti, y esey ta cu e experiencia malo aki por haya su ripiticion den e cooperacion den e añanan cu ta bin, unda acuerdonan na nivel di gobierno ehecutivo por keda torpedea den parlamento. Y esaki ta keda un punto sensitivo, di cual den e caso di Corsou tampoco ainda no tin claridad con a regla esaki. Si djis imagina e circo increible cu parlamento di Corsou tabata den e ultimo decada, y esun di Aruba no mucho mihor, nos tin aki un di e puntonan mas delicado pa regla, unda di un banda ta keda existi cierto autonomia di e islanan, pero di otro banda lo mester cumpli cu e acuerdonan pa e fondonan disponible den e cooperacion aki por yega unda nan mester yega. Hunto cu esaki tin e problema di e Begrotingskamer cu gobierno di Aruba ta desea, cu no lo trece mucho mehoracion si ta trata di un entidad consehero, cu no tin nada di bisa den nos structura di poder. Experiencia cu entidad consehero, cu den practica a resulta ‘cacho sin diente’, nos tin suficiente den e ultimo 34 aña caba. Lo ta bon si nos por cuminza haya claridad anto riba contenido di e acuerdo logra. Pabien Aruba.

LEAVE A REPLY

Please enter your comment!
Please enter your name here