“Nos tur mester yuda”; esey ta e mensahe cu secretario di estado Knops tabatin pa nos despues di su reunion cu gabinete di Aruba. El a recorda nos cu e situacion ta especialmente dificil pa esnan cu a perde trabao y cu awe ta depende di ayudo, local y for di Hulanda. Realmente nos no ta kere cu nos mester di e recordatorio aki. E problema social principal na e momento aki ta y ta keda e miles di famia cu no tin un manera pa mantene nan mes riba pia, pa e simple motibo cu nan a keda sin trabao.

Tanten economia no bolbe na un nivel aceptable no lo tin cambio den e situacion ey y tur e tempo ey nos lo mester e ayudo Hulandes riba e tereno aki, y tur cu por contribui, mester haci esey. No tin ningun duda den esaki.

Kico e scretario di estado tabata implica realmente cu e observacion aki? E no por tabata referi na e empleadonan den sector priva, cu pa un gran parti a entrega un porcentahe considerable di nan salario, den hopi caso pa di e manera aki keda haya un salario, sin cu den tur caso realmente e empresa tin trabao pa nan. Mester bisa si cu aki e situacion ta varia, unda ta posible tambe cu un empresa ta sigui opera, mester di su hendenan pero tin nan ta traha horario completo pa un salario recorta. Y un pregunta grandi cu a keda ta cuanto empresa ta sigui wanta e situacion aki, si no tin mehoracion economico den e proximo lunanan.

Pero nos ta kere cu e secretario tabata referi na algo otro. E no a duna un contesta directo riba pregunta tocante e intento di e sindicato di empleado di hospital pa comunica cu su persona, encuanto e 5% di salario cu nan mester a entrega, como parti di e operacion pa yega na e austerisacion den sector di salud, a base di e cinco miyon florin pa luna cu mester corta den e gastonan di salud publico. Ta parce nos cu su mensahe tabata dirigi na e grupo aki y mas en general na e entidadnan gubernamental y semi-gubernamental cu e fenomeno di austerisacion no a caba na e medidanan tuma aña pasa, pero cu e situacion e aña aki ta mes o mas grave y lo mester confronta e situacion aki. Ademas, e lo ta referi na e entidadnan cu te awor a haci manera cu nan no ta parti di Aruba y no a contribui nada ainda, den forma di corta salario.

Cu esey e mandatario Hulandes tabata un tiki mas explicito cu nos propio Promer Ministro di loke nos tin nos dilanti, unda e ultimo aki ta keda pronuncia palabra mas suave, cu no ta duna tanto claridad. Aunke aki tambe por bisa cu nos no mester pa e pronuncia esaki, na varios ocasion nos a trece dilanti cu e situacion na 2021 ta posiblemente mas dificil ainda pa e gruponan mas vulnerable, y pa gobernacion en general tambe. Den caso di e ultimo aki lo bira dificil pa ‘squeeze’ mas recurso for di un economia paralisa, sin afecta seriamente e poder di compra, cu a keda reduci seriamente caba den e aña nos tras. A yega na un solucion parcial pa esey si: pa un parti di e cartera di tur hende; ta pesey a duna un reduccion riba loonbelasting, pa por cobra den e siguiente fase di e proceso, ora hende bay cumpra cos cu e poder di compra aumenta (moderadamente). Nos no ta bisa esaki como critica, sino como constatacion neutral con ta maneha un manera pa aumenta poder di compra un poco, pero no di tal manera cu gobierno ta perde tanto entrada. Sin embargo, mester ta cla tambe cu esaki no ta suficiente pa gana guera, y esey ta implica cu lo ta bay tin un austerisacion considerable na caminda, pasobra cu un entrada di gobierno limita como perspectiva, no por tin otro alternativa. Realmente ta reconoce cu mehoracion di e situacion lo ta solamente posible si economia mehora, pero ta conoci caba cu esey no ta bay ta e caso, salvo un milagro economico di tamaño considerable.

Awor, realmente kico nos a haya sa despues di e reunionnan cu e secretario di estado a hiba na Aruba cu gobierno y cu varios otro entidad? En todo caso nada di kico lo ta e medidanan concreto cu lo bay tuma. Nos no por a spera esey tampoco di e secretario, cu ta laga esey na esnan cu tin e responsabilidad di haci esey, nos Promer Ministro y su coleganan di gabinete. Ta nan mester duna claridad, tambe na e sindicatonan, envez cu nan ta bay haci ridiculo bay puntra e secretario loke nan lo mester puntra nos mandatarionan.

Nos tur mester yuda, den e crisis gigantesco aki sigur, y nos ta di acuerdo cu esey. Lo ta haci bida mas facil si, si nos por haya algun claridad ta kico esey ta encera. Di e manera cu e asuntonan ta bay actualmente, ta bay dura varios luna promer cu Aruba, e trahador den sector priva y publico, e empresario y publico en general haya sa den ki rumbo nos ta bay. Nos merece mihor.

LEAVE A REPLY

Please enter your comment!
Please enter your name here