Den un comunicado publica den nos edicion di awe, gobierno ta insinua cu oponentenan (lesa: portal 24ora.com) ta difundi rumor falso tocante 9 miyon aproba pa renoba infrastructura di Arubahuis den presupuesto di DOW. E hechonan sinembargo ta mustra cu e portal den cuestion a puntra e minister directamente tocante e asunto y na e momento ey e minister a evadi di responde e pregunta directamente. Es mas, parlamentarionan di coalicion mes a cuestiona e proyecto aki.

Minister di Infrastructura Marisol Lopez-Tromp (POR) riba su pagina di Facebook a desmenti e noticia cu portal 24ora a publica unda ta bisa cu a pone 9 miyon disponibel pa renobacion di Arubahuis den presupuesto di DOW. Sinembargo, si analisa e echonan di con a yega na publicacion, ta remarcabel cu na momento cu un reportero di 24ora a acerca e minister cu e siguiente pregunta, e minister no a desmenti loke tabata treciendo dilanti.

“A ripara cu a haya aprobacion tambe pa 9 miyon of ta 6 miyon, minister por corigi mi, pa e renobacion di infrastructura di Arubahuis. Ta sinti cu na e momento aki, den e crisis, e tabata na su luga?”. Riba esaki e minister a contesta: “Bo por bisa cu cada ministerio ta pidi e peticionnan cu e kier y cu e ta sinti cu ta importante pa inversion. Den caso di nos di Infrastructura, semper bo t’ey pa yuda cada un cu nan proyecto den gobierno, naturalmente segun tin placa pe. […] Al momento nos ta yudando cu fast-tracking di tur proyecto y di tur loke na e momentonan aki Aruba tin mester di dje pa stimula nos economia bek”.

Parlamentarionan di coalicion tambe a cuestiona 9 miyon pa Arubahuis.
Durante e tratamento di presupuesto di DOW hasta miembronan di coalicion a trece dilanti nan preocupacionnan pa loke ta trata e proyecto di renobacion di Arubahuis, mirando e crisis causa pa COVID-19. Tanto Edgard Vrolijk (MEP) como Ricardo Croes (RED) a cuestiona dicon ta mira 9 miyon pa renoba Arubahuis y si esaki ta un prioridad. Vrolijk a comenta cu: “Mi ta wak 9 miyon pa drecha nos Arubahuis na Hulanda pero nos no tin un florin pa busca un truck pa busca awa pa nos agricultornan y nos ta muri di hamber akinan. Naturalmente nos tin un bunita cas Arubahuis na Hulanda. Mi ta kere nos mester fiha nos prioridadnan y manehonan hopi mas aworaki dirigi riba nos pais.”

Nos fuentenan fededigno ta indica cu e fondonan pa renoba Arubahuis ta den ‘bespreking’. E presupuesto di DOW, segun nos fuentenan, manera cu e ta pa temponan di COVID-19, ta consisti di trabounan otorga y algun cu mester discuti riba nan ainda. Kiermen cu e 9 miyon pa Arubahuis ta forma parti di e grupo di trabounan cu mester discuti ainda.