Bao guia di Ministerio Publico di Aruba, e Unidad di Criminalidad Organiza di Cuerpo Policial di Aruba a tuma cinco container di hero bieu den beslag riba diabierna ultimo den haf di Barcadera. Segun nan ta informa prensa por medio di un comunicado. Nan ta sigui bisa cu e containernan a wordo hiba pa marinierskazerne na Savaneta, unda nan a wordo habri y ristra riba diasabra y diadomingo cu ayudo di e 32e raiding squadron di Korps Mariniers, di Arubaanse Militie y Kustwacht.
A resulta cu tabatin cocaina scondi den klepnan di baki di pick-upnan, cu cada uno mester a wordo corta habri. En total a tuma mas o menos 300 kilo cocaina den beslag. Awemainta e homber R.D.R. di 30 aña di edad (Venezuela) a wordo deteni relaciona cu e investigacion. No ta exclui mas detencion. E investigacion ta sigui full speed segun Ministerio Publico
