Ayera Ministerio Publico a tuma nota di un noticia cu a wordo publica e siman aki pa/of den nomber di sr. Dave Holloway, tata di Natalee Holloway. Posiblemente lo ta trata di restonan di wesonan humano, cu a wordo haya na Aruba y cu lo ta di interes relaciona cu desparicion di hoben Mericano Natalee Holloway.
En conexion cu e informacion procedente di señor Holloway, Cuerpo Policial di Aruba a haci investigacion e aña aki bao guia di Ministerio Publico di Aruba.
Durante e investigacion aki di Polis den un area cu señor Holloway a indica den e informacion cu el a entrega, no a wordo haya restonan di wesonan humano segun Ministerio Publico.
Aparentamente na e momento aki, atrobe informacion a wordo publica pa of den nomber di sr.Holloway tocante resultadonan di un investigacion haci na Aruba.Sinembargo, actualmente no ta conoci na Ministerio Publico of na Polis, hechonan nobo of circumstancianan nobo relaciona cu hayazgonan di weso, cu a wordo investiga of mester wordo investiga. Si en caso echonan nobo of circumstancianan nobo surgi den futuro, lo haci investigacion serio di esakinan, OM ta laga sa pa medio di un comunicado di prensa.
Esaki mas cu claro ta conta pa tur caso di desaparicion di un persona.
