Home Local OM ta pidi comunidad ayudo pa resolve asesinato hoben Sierra

OM ta pidi comunidad ayudo pa resolve asesinato hoben Sierra

678

Ayera den un conferencia di prensa, Ministerio Publico a haci un apelacion na comunidad cu si tin hende/testigo cu sa algo den e caso aki, pa bin dilanti cu e informacion pa por yuda resolve e caso di asesinato na de Vuyst aña pasa.

Den cuadro cu detencion recien di e sospechoso Jairo Chalgut den e caso di asesinato di hoben S. Sierra na De Vuyst na november 2017, Ministerio Publico ta opta pa no duna mas detayenan si tin mas sospechoso riba lista di detencion of no. Pero nan no ta descarta si lo tin mas detencion. Nan ta informa cu e sospechoso a wordo deteni a base di nombernan cu a wordo duna na autoridadnan. Sr. Chalgut ta un homber di 46 aña di edad y conoce di e famia di e victima. OM ta bisa como medida di prevencion, ta opta pa na momentonan aki no brinda mas informacion/detayenan pa esaki no yega na e sospechoso of sospechosonan y stroba investigacion ainda andando, ni tambe yuda e sospechoso pa prepara su contestanan den corte.

Ta mucho trempan pa acusacion na momentonan aki mientras ta scucha declaracion di e sospechoso, y analisis di resultado di muestranan cu a wordo tuma y otro resultadonan di e investigacion. E sospechoso tin actualmente restriccion na television, computer, y por solamente yama su abogado hunto cu un personal di KIA na banda. “Mi kier felicita nos coleganan policial pa a traha asina duro y bin cu resultadonan asina lihe, mirando cu ta parce cu nos ta den resolve e caso aki”, procurador general a comenta.

Caso a haya hopi atencion di prensa
OM a abstene e ultimo temponan aki pa publica informacion y tuma tur nan tempo riba e investigacion pa asina ta sigur cu nan no ta bay detene hende cu no tin nada di haber cu e caso. Procurador general Alexander van Dam a remarca cu e por a compronde cu e caso aki realmente a haya hopi atencion di prensa, cu cada bes ta purbando di haya mas informacion. Desde e comienso di e investigacion, diferente testigonan a nombra varios persona cu kisas lo tabata tin conexion cu e caso.
“Di tur e personanan cu a wordo nombra, a surgi un investigacion riba nan pa determina si nan en berdad tabata envolvi den e caso aki. Pa motibo cu djis un nomber di hende no ta haci nan sospechoso, mester bin un investigacion pa wak unda nan tabata ta na e momento ey, analisa informacion di celular y mas”, sr. Van Dam ta splica. E tipo di investigacion aki ta costa hopi tempo pasobra Ministerio Publico y autoridadnan envolvi ta haci esaki cu hopi cautela segun e. E sospechoso lo wordo confronta cu e resultadonan di e investigacion cual lo sigui wordo uza durante e investigacion. Medionan di comunicacion a haci varios pregunta ayera di cual Ministerio Publico a opta pa no duna contesta pa no mester bay mucho leu den detayenan.

‘Un crimen hopi cruel’
Alto Comisario Dolfi Richardson a subraya cu dependiendo di e spoornan cu a wordo haya lo delinea e forma con ta procesa esaki. “E tabata un escena di crimen basta fastioso. E tabata un crimen hopi cruel y lo mi rat’e basta halto.” Sr. Richardson como tambe procurador general a felicita coleganan cu a haci un bon trabao pa a yega asina leu den e par di lunanan aki despues di e crimen.
“Specialmente recherche di San Nicolas encabesa pa fiscal, y tambe coleganan cu a dirigi e investigacion, Technische Recherche cu tambe a haci un trabao sublime. A pesar cu tabata tin hopi presion pa resolve e caso aki, e coleganan a sa di mantene nan trankilidad y traha cu diligencia pa asina por yega na resultadonan aki.”