Home Local Movecion diplomatico pa lanta embargo pero gobierno di Venezuela no kier firma...

Movecion diplomatico pa lanta embargo pero gobierno di Venezuela no kier firma acuerdo

436

Prome minister, Evelyn Wever-Croes (MEP) a bisa cu otro siman e lo ta den parlamento pa duna mas informacion na e miembronan di nos organo legislativo riba e topico di Venezuela y unda nos pais Aruba ta para, y mas detayenan.

Aunke tin algun movecion ainda e documento di compromiso bilateral no a keda firma. Mientras cu e no ta firma, nos frontera ta permanece cera. Esaki kiermen cu nos no ta ricibi nada di Venezuela.

Si e frontera ta habri bek nos tin cu corda cu tin regla nobo cu ta aplicabel riba importacion for di Venezuela. Pues pa un hende importa algo di Venezuela bo mester cumpli cu cierto rekisitonan entre nan un certificado di origen, permiso y documentonan cu ta ilustra cu autoridadnan Venezolano ta permiti bo sali cu bo productonan importa for di e pais bisiña ey.

Esey nan ta palabracionnan cu nos a haci cu Venezuela y nos ta bay mantene nan”, segun premier Wever-Croes. Esaki independiente cu si embargo ta wordo lanta of no.

Aunke e embargo aereo y maritimo cu e gobierno di Venezuela a impone unilateral contra nos isla no a wordo lanta ainda, tin movecion cu ta wordo haci riba nivel diplomatico pa reestablece e relacion historico bilateral aki.

Prome minister Wever-Croes a laga sa cu di parti di Venezuela, e gobernador di estado Falcon a intermedia hopi pa percura un reestablecemento di e actividadnan entre Aruba y Venezuela, pero muy specialmente cu e estado aki. Prome mandatario di Aruba a bisa cu estado Falcon ta un estado cu mas a sufri a causa di e embargo aki.

E siman aki tabatin movecion pa logra finalmente e firma di un documento cu ta compromete ambos parti entre otro riba e exigencia di Venezuela pa bin cu mas control riba contrabanda di mineralnan manera koper cu ta sali ilegal for di nan pais. Pero te ainda e documento aki no a keda cla ainda cu e firma di e gobierno di Venezuela. Pero segun nos prome mandatario ‘tin un poco di movecion den esey contrario na e ultimo biaha cu mi a duna un up date di dje’.