Latino America y Caribe ta e responsabel pa 20% di e cuminda cu ta perde rond di mundo desde e cosecha te su yegada na punto di benta, segun un informe di oficina regional di FAO a revela ayera.
E Indice di Perdida di Alimento desaroya pa FAO ta permiti pa e paisnan midi e cantidad di alimentonan perdi despues di e cosecha y durante e almacenamento, transporte y proceso, pero esey no ta inclui e nivel di benta al por menor (of ora e ta yega na supermercado y tiendanan), den e cual formalmente e perdida ta converti den desperdicio.
Cu apenas 9% di e poblacion global, e region ta responsabel di un kinto di e perdidanan di alimento.
Enfoca riba e perdidanan cu ta sosode na Latino America y Caribe, segun Organisacion di Nacionnan Uni pa Agricultura y Alimentacion (FAO), e region ta perde 12% di su alimento, menos cu e promedio global di 14%.
Na henter mundo, di acuerdo e reporte, e causa di e perdida di alimento ampliamente ta diferente a lo largo di e cadena di suministro. Na granhanan, por ehempel, e perdida den su mayoria ta produci pa ‘cosecha na e momento inadecua, mal condicion climatico, practica robes di maneho di cosecha, y desafio do comercialisacion di productonan’.
Den tanto, durante e transporte, un infrastructura fisico bon y un logistica comercial ta clave pa evita e perdida di alimento, mientras cu un procesamento adecua y paketa por cumpli un papel importante na conservacion di alimento.
