For di Hulanda den ultimo dianan a yega informacion cu Conseho di Minister di Reino ya caba a prepara un posibel ‘aanwijzing’ pa Gabinete Wever-Croes, cu simplemente no kier cumpli cu promesanan haci na tanto CFT como gobierno di Reino, pa loke ta su maneho financiero.

Lider di fraccion di AVP, Marlon Sneek a mustra cu tin un contraste grandi pa loke ta pasando tanto na Hulanda cu e situacion di gobierno aki na Aruba, ya cu mientras cu ta sigui insisti cu gobierno di Prome Minister Evelyn Wever-Croes no ta cumpliendo cu normanan cu nan mes a bay di acuerdo y hasta a propone den un protocol.

“Nunca antes pais Aruba y hasta den henter Reino Hulandes, a yega di conoce un gobierno cu ta troce su propio palabra di honor duna, caminda na cabes di e proceso aki, tin e lider indiscuti di gañamento, esta Premier Wever-Croes.

Informacion di ultimo dianan aki for di Hulanda, ta mustra cu e concepto pa un aanwijzing diabierna awor pa Gabinete Wever-Croes ya ta cla y ta keda na Prome Minister di Aruba convence Hulanda pa no bin cu esaki.

Sinembargo, na momento cu ya a cumpli un aña cu Wever-Croes y Minister di Finansa Xiomara Ruiz-Maduro, a firma un protocol cu gobierno di Hulanda pa pasonan cu mester wordo tuma pa sigura un miho maneho di e situacion financiero di Aruba. Hulanda ta constata cu net nada a wordo haci y al contrario, e maneho financiero di e gobierno di coalicion, ta bay den rumbo robes.

En realidad por conclui cu Hulanda ta mirando cu practicamente e gobierno di Evelyn no tin maneho financiero, no ta tene su mes na su propio vision di baha gastonan di e aparato di gobierno y na luga di haci esaki, e gastonan ta sigui aumenta.

Loke ta haci e situacion hopi mas serio ta e hecho cu Minister Presidente ta sinta aki na Aruba, sigui emplea mas hende de servicio di gobierno y no por bin cla cu ehecucion di e protocol cu el a firma na 2018.

Acerca ta bin e hecho cu ainda Evelyn no por cumpli cu loke el a bisa ultimo bes na gobierno Hulandes, esta cu e lo ‘fix’ e ley cambia cu Parlamento a aproba riba e rol cu CFT tin cu hunga den control riba finansa publico.

For di e tempo ey caba mandatarionan Hulandes a declara cu nan kier mira e ley cu a wordo cambia pa medio di un amienda di lider di fraccion di MEP, wordo cambia y wordo destrui, pero ainda e ley aki, cu ainda no a wordo oficialisa cu firma di Gobernador, ta sinta riba lessenaar di Evelyn.

Simplemente e no ta cumpliendo cu loke el a palabra cu Hulanda y su gobierno ta prefera di bay Parlamento pa haci cambionan den e ley di Serlimar pa asina e lider di POR por sigui den gobierno, na luga di bay parlamento y cambia e ley di LAFT cu Hulanda kier mira prome cu diabierna venidero.

E falta di respet aki, pa cumpli cu promesanan haci, ta algo cu a bira tradicional di Evelyn Wever-Croes, ya cu ta su persona y su partido a priminti pueblo shelo y tera, cu e lo atende e situacion financiero di gobierno sin tuma medida pero ya tin dos aña ta castigando pueblo sin misericordia.

Na momento cu un lider politico, como lider di e pais ta gaña henter pueblo cu su maneho, simplemente no por spera mucho cos positivo y awor ta Hulanda ta sinti esaki den propio carni.

Siman pasa na luga di atende e asunto cu Hulanda den forma serio, sea biahando pa Hulanda pa deliberacion, Wever-Croes, a sigui cu su maneho di un pirata, firmando un MoU cu CITGO riba e proyecto di refineria pa despues bin declara cu el a logra miyones di florin pa tapa e buraco den su presupuesto di 2019.

No ta interesa Evelyn net nada kico ta pasa cu e pais, kico ta pasa malo cu pueblo di Aruba, pero ta regla cosnan pa su amigo y famianan, regla cosnan pa esunnan cu ta sostene su gobierno, mientras cu e ta pone pueblo awor na merced di gobierno di Reino,” Sneek ta mustra.

 

1 COMMENT

  1. Once again: ” cu orguyo nos tur ta bai paga e mega debe, senjor presidente!” Nothing will ever top these words, AVP where our problems were conceived: now that the baby is born……………the father of the baby does not want to be responsible any more.

LEAVE A REPLY

Please enter your comment!
Please enter your name here