(AP) — Asamblea General a aproba e prome resolucion di Nacionnan Uni riba inteligencia artificial (AI) ayera, dunando sosten global na un esfuerso internacional pa sigura cu e tecnologia poderoso nobo ta beneficia tur nacion, ta respeta derechonan humano, y ta “safe, sigur y confiable.”
E resolucion, patrocina pa Merca y co-patrocina pa 123 pais incluyendo China, a keda adopta cu consenso y in un voto, loke ta nifica cu e tin sosten di tur 193 nacion miembro di ONU.
Na e reunion di lidernan mundial september ultimo na e Asamblea General, presidente Joe Biden a bisa cu Merca tin plan pa traha cu competidornan rond mundo pa sigura cu ta dirigi AI “pa bon mientras ta protege nos ciudadanonan di e riesgo mas profundo aki.”
Den ultimo lunanan, Merca a traha cu mas di 120 pais na Nacionnan Uni – incluyendo Rusia, China y Cuba – pa negocia e texto di e resolucion adopta ayera.
Na un conferencia di prensa despues di e voto, embahadornan di Bahamas, Hapon, Hulanda, Maroco, Singapur y Reino Uni entusiasticamente a sostene e resolucion, uniendo embahador Mericano cu a yam’e “un bon dia pa Nacionnan Uni y un bon dia pa multilateralismo.”
E resolucion tin meta pa cera e division digital entre paisnan rico desaroya y paisnan mas pober den desaroyo pa sigura cu nan tur ta na mesa den discusionnan riba AI. Tambe tin meta pa sigura cu paisnan den desaroyo tin e tecnologia y capacidad pa tuma bentaha di e beneficionan di AI, incluyendo deteccion di malesa, prediccion di inundacion, yuda agricultor y train e proximo generacion di trahado.
E resolucion ta reconoce e aceleracion rapido di desaroyo di AI y su uso, y ta destaca “e urgencia pa logra consenso global riba sistemanan sigur y confiable di inteligencia artificial.”
Tambe ta reconoce cu “gobernacion di sistemanan di inteligencia artificial ta un area den evolucion” cu mester mas discusion riba posible maneho di gobernacion. Y ta destaca cu innovacion y regulacion ta reenforsa mutuamente – no exclui mutuamente.
Companianan ‘Big Tech’ generalmente a sostene e necesidad pa regula AI mientras ta lobby pa sigura cu cualkier regla ta traha den nan fabor.
Legisladornan di Union Europeo a duna aprobacion final dia 13 di maart pa e prome reglanan comprensivo di AI na mundo, cu ta na caminda pa drenta na vigor na mei of juni despues di algun formalidad final.
