Oportunidad pa Venezuela?
E siman aki e organisacion di pais exportado di petroleo (OPEC) a yega na un acuerdo na Viena, Austria, pa reduci nan produccion di petroleo desde 1 di januari 2017, cu 1,2 miyon bari pa dia. Esaki den un intento pa mehora prijs internacional di crudo a traves di reduccion di oferta riba mercado.
E participacion di e paisnan cu ta conforma OPEC no ta suficiente, y participacion di Rusia y Mexico, entre otro, ta crucial pa exito di e acuerdo aki. Comentario skeptico ta bin di diferente banda. Pa cuminsa, den pasado e mesun miembronan di e cartel no tabata respeta acuerdo entre nan. Si esey ripiti, e acuerdo lo ta letra morto prome cu e cuminsa. Pero ta parce cu tin un consenso, den e sentido cu tur ta sinti e dolor di haya hopi menos recurso desde 2014 cu prijs di crudo a baha drasticamente, en bista di un exceso di petroleo riba mercado mundial.
Pa duna un impresion: desde cu prijs tabata riba US$ 100 pa bari na 2014, el a cuminsa baha, te yega na prijs di poco mas cu US$ 30 pa bari na inicio di e aña aki. Despues el a mehora te entre 45 y 50 dollar recientemente. Ta anticipa cu pa 2017 prijs lo ta entre US$ 50 y US$ 60 pa bari, loke ta mustra faborabel pa tur productor.
Pero esey no ta tur. E caida di prijs den ultimo añanan no a cay for di cielo. E tabata un accion bon pensa di e productor mayor di OPEC, Saudi Arabia, pa pusha e productornan di ‘shale oil’ na Merca for di mercado. Shale oil en general ta un proceso mas costoso cu ta haci cu na prijs di 40 – 50 dollar e companianan Mericano no tabata rendabel. Pero nan no a sinta keto. Nan a mehora tecnologia y sistema di explota di tal forma, cu actualmente nan por competi na prijs di alrededor di 45 – 50 dollar pa bari. Si prijs mester mehora riba US$ 50, nan ta ‘back in business’ tambe.
Un espacio den mercado laga atras pa OPEC di 1,2 miyon bari pa dia ta brinda oportunidad pa aumenta produccion na un bon prijs, y ademas ta trata di produccion local Mericano cu ta influencia prijs na bolsa di New York directamente. Ademas esaki ta reduci importacion necesario for di exterior, loke ta afecta e otro competidonan riba mercado internacional.
Tur esaki ta trece duda aden si e acuerdo di OPEC lo bay wanta tanto tempo. E acuerdo ta pa seis luna, cu opcion pa seis luna mas. En todo caso, no tin motibo pa canta gloria ainda di banda di esnan cu a promove e acuerdo aki den OPEC. Un di e protagonistanan mas importante ta nos bisiñanan di Venezuela cu a move cielo y tera pa logra esaki. Mirando e situacion economico deplorabel di e pais esaki ta di comprende. Den e acuerdo cera awor, Venezuela a tuma na su encargo pa reduci su produccion cu 90.000 bari, loke no ta problema, pero pa un motibo peculiar. E pais no tin ningun problema pa compromete su mes cu e reduccion ey pa e simpel motibo cu nan problema ta con pa mantene nan nivel actual di produccion, cu ta net riba 2 miyon bari pa dia actualmente. Ta mas probabel cu e pais no por detene e caida den produccion pasobra mantenemento di e instalacionnan actual ta cayendo pa motibo di falta di capital pa paga e companianan specialisa cu ta ofrece e tipo di servicio sofistica cu nan mester.
Sin embargo, miho prijs di crudo ta parce di por ta e salbacion pa e regimen di Nicolás Maduro. Ta parce, solamente. Na un produccion di un poco mas di dos miyon bari pa dia, di cual posiblemente 1,5 miyon ta disponibel pa exportacion, esey ta duna un beneficio di alrededor di 15 miyon dollar pa dia, pa cada 10 dollar cu prijs subi. Na un subida di 20 dollar pa bari, algo no anticipa, e pais ta gana 30 dollar pa bari pa dia, riba base anual casi 11 biyon dollar extra. Esey lo ta suficiente pa paga e debenan na bono y interes cu tin pendiente na 2017, cu ta un poco menos cu 10 biyon dollar.
E problema ta cu gradualmente un gran parti di loke ta disponibel na divisa ta bay den importacion di tur sorto di producto cu anteriormente e pais mes tabata produci. Si no logra reactiva produccion local, y ta parce cu e situacion actual no ta duna pa esey, a pesar di dialogo cu Vaticano y otro personahe di prestigio na mesa, PDVSA no ta keda cu suficiente recurso financiero pa pone orden den cas y destina su beneficionan na drecha su instalacionnan y aumenta produccion.
Si den curso di e aña cu ta bin, otro actornan den e mercado di petroleo acapara e espacio cu OPEC ta brinda awor, ta posibel cu e aumento di prijs di crudo lo ta modera, no suficiente pa brinda e regimen Venezolano actual e oxigeno cu e mester pa sobrevivi.
