Oposicion Venezolano ta carece di claridad

Participacion na eleccion controla pa Maduro no a resulta

‘Damned if you do, damned if you don’t’. Asina por bisa di e situacion den cual oposicion contra regimen di Nicolas Maduro a haya nan mes aden. Cu un asamblea constituyente cu ta consisti di Chavista, un conseho electoral den man di Chavista, un tribunal supremo igualmente, tabata inimaginabel cu por tabatin eleccion husto y corecto diadomingo pasa. Ademas e eleccion boicotia pa yega na constitui e Asamblea Constituyente tabatin fraude na gran escala, denuncia pa e compania Britanico cu pa añanan largo a brinda servicio digital pa eleccion na Venezuela. Nan tabata papia di mas di un miyon voto fraudulento.

Sinembargo, oposicion reuni den e plataforma mesa di Unidad Democratico a dicidi cu entre dos cos malo, ta miho opta pa bay eleccion. Keda sin participa lo a significa entrega e 3 puestonan di gobernador cu nan tabatin. Awor nan a haya 5, pero cu e decepcion grandi pasobra nan a spera hopi mas cu esey. Asina naief nan tabata pa pensa cu e regimen lo no a uza tur posibilidad pa manipula e resultado? O nan tabata pensa cu e apoyo popular tabata asina grandi cu lo tabata imposibel pa gobierno comete tanto fraude y di mes nan lo a gana mayoria di e puestonan? Esey por ta e caso. Di tur manera nan a opta pa no keda for di e cendiendo, algo cu si nan a haci den e votacion pa e asamblea constituyente algun luna pasa, considerando esaki ilegal y anticonstitucional.

Por ta cu e curso cu nan a sigui e aña aki ta impedi nan haya e apoyo total di e poblacion y esey ta esencial pasobra ningun pueblo gusta zig zag. Djis pone tras di otro loke a sucede den e aña aki. Prome ta yama tur hende pa subi caya cuatro luna largo, ta boicotia un eleccion di e regimen, a organisa un referendum cu bastante exito, despues ta para tur accion, ta bay un dialogo fracasa na Republica Dominicana, pa finalmente bin acepta participa na eleccion regional cu ta completamente manipula pa e regimen. Y ainda bo ta desea cu hende ta sigui bo?

Oposicion ta hinca den un situacion incomodo, unda a duna prestigio na eleccion organisa pa un dictadura, pero sin resultado positivo. Ademas, hasta den e caso cu nan lo a gana, e regimen tin mil y un manera pa haci bida di e gobernadornan di oposicion imposibel, incluyendo encarcelamento o retiro pa cualkier pretexto cu nan ta inventa, eventualmente hunto cu Tribunal Supremo, cu tin como presidente un ex agente di inteligencia y asesino condena pa mata hende durante interogacion, cu a bira abogado. Pa nos tin un impresion di ki tipo di delincuencia ta na poder den e pais.

Den e situacion cu a surgi awor, ta logico cu ta scoge pa continua cu e lucha riba caya, pero ya den otro situacion. Lo tin apoyo den pueblo ainda, pero nan ta cansa. Nan a mira cu lunanan largo di accion riba caya tur dia a resulta den mas di 100 morto entre e manifestantenan, y nada mas. E opositornan reuni den MUD a acorda un intento di dialogo via presidente di Republica Dominicana y ex prome ministro di Spaña, pero esaki a fracasa prome cu el a cuminsa.

Den henter e situacion dificil aki, e forsanan democratico tin un aliado fuerte cu e regimen no por vence: hamber. Mientras gobierno y oposicion ta hiba un guera politico, economia di e pais ta den un caida acelera, sin nada pa para su curso. E situacion ta asina serio caba, cu ningun hende por soluciona e problema grave aki. Simplemente e divisa cu e empresa estatal PDVSA ta produciendo no ta yega pa mantene nan mes, y ademas paga pa tur importacion necesario di cuminda, medicamento, otro material indispensabel, y ademas mantene e regimen corupto. E consecuencianan ta pa e poblacion, cu tin cada biaha mas problema pa yega na cuminda. Tambe persona cu mester di tratamento medico, specialmente esunnan cu mester medicamento special cu e pais no ta produci, manera pa trata cancer y problema cardiaco, a yega na e punto cu hende simplemente ta muri.

Pero oposicion no por sinta keto anto warda hamber y tempo haci nan trabao. Laga e masa yega na e punto cu nan ta lanta den accion desordena, terminando den sakeo y matanza, no ta e manera pa yega na poder. Hende kier mira liderazgo, y esey, sigur despues di e decepcion grandi di cuatro luna di accion diario riba caya cu no tabatin resultado, ta loke oposicion tin problema pa brinda. Awor ta opta un biaha mas pa bolbe pa accion riba caya, den condicionnan hopi menos faborabel. Esey por bay tin un efecto negativo riba participacion popular , mientras cu e represion no ta bay cambia su curso. Di e presion di exterior no por spera tanto tampoco, boycott di cuenta di banco di e lidernan di e regimen no ta cambia tanto. Cu eleccion presidencial na horizonte na 2018, oposicion mester busca con pa recupera liderazgo. Y esey bo no ta gana cu bay di un extremo pa otro. Pueblo no gusta lider cu ta zig zag.

 

You May Also Like

Nos ta wak solamente e ganashi a corto plazo?

Na algun momento den curso di aña 2011 o 2012, un di nos redacrtornan ...

Nos no por para proyecto dañino

Prome cu nan bira costoso? Nos ta contento cu algun decision clave cu gobierno ...

Salubridad prioridad? Continuacion…

Den nos editorial di ayera nos a enfoca hopi riba e prioridadnan y costo ...

Maneho ambiental ta invisibel ainda?

Ora prensa ta buscando contesta pa pregunta cu ta surgi encuanto maneho di medio ...

Tin alternativa pa aumento di salario minimo?

Dialogo (publico) a cuminsa Despues di e prome shock di e anuncio di kier ...

Innovacion ta keda algo incierto?

No ta indica un caminda cla Den un encuesta reciente, Banco Central a bay ...