E observatorio Checo di derecho humano CASLA di Praga a presenta na Corte Penal Internacional (CPI) na Den Haag casonan nobo di supuesto tortura na Venezuela, asina e director ehecutivo di e l entidad, Tamara Sujú, a informa na agencia EFE.
“Tur cos ta haci pa por tin un investigacion di parti di e Corte Penal Internacional pa crimennan di lesa humanidad,” Sujú a splica, cu ya na mei 2016 y januari 2017 a presenta na e magistratura internacional dos expediente di tortura cu lo a afecta mas di 600 persona.
E dossier nobo, presenta diahuebs pasa na Den Haag, ta contene seis incidente di supuesto tortura entre april y juni, y cu lo a afecta 120 persona. Tambe a responsabilisa pa maltrato e actual gobierno na Caracas, bao presidencia di Nicolás Maduro.
“Entre e crimennan di lesa humanidad contempla tin e asesinato pa motibo politico, encarcelamento inhusto di persona pa motibo politico, tortura y persecucion sistematico di un poblacion o grupo,” e hurista a detaya. Entre otro caso, ta detaya e maltrato di e abogada Yolibeth Colmenares, den estado Barinas, cu a keda deteni den un manifestacion y a sufri agresion, manera haya golpi di punt’i pia y culata di arma di candela, ricibi orina den su partinan intimo.
Ta describi tambe violacion di Cristian Jiménez, un acto cu a sucede na La Victoria, estado Aragua, y atribui na miembros di Brigada 42 di Guardia Nacional Bolivariano.
Sujú a sigura cu e “cabesnan na mando di e terible represion y violacion di derecho humano cu sociedad Venezolano ta sufri, tin nomber y apeyido.”
El a referi na general Vladimir Padrino, ministro di Defensa; general Néstor Reverol, ministro di Interior y Husticia; general Benavides Torres, comandante di Guardia Nacional Bolivariano; y general Gustavo González López, director di SEBIN;
Tambe el a cita entre e responsablenan di e torturanan general Iván Hernández Dala, director di e Division di Inteligencia Militar; y Carlos Pérez, director di Polis Nacional Bolivariano.
