Organisacionnan ambientalista den Hulanda Caribense lo no sobrevivi e pandemia

Organisacionnan ambientalista den Hulanda Caribense ta desempeña un rol critico den maneho di e recursonan natural di e islanan, pero por no sobrevivi e crisis di Covid-19, segun Aliansa di Naturalesa Hulanda Caribense (DCNA) a bisa den un memo reciente na su patron, prinses Beatrix di Hulanda.

E memo a duna un update pa e prinses riba e estado di e seis organisacionnan di maneho di naturalesa den Hulanda Caribense y nan retonan financiero a consecuencia di e pandemia.

E seis organisacion ta Fundacion Parke Nacional Aruba, Fundacion Parke Nacional Bonaire STINAPA, CARMABI Corsou, Fundacion Parke Nacional St. Eustatius STENAPA, Fondo di Conservacion Saba (SCF) y Fundacion Naturalesa St. Maarten.

E memo a argumenta cu e calidad di naturalesa den Hulanda caribense ta deteriorando ‘tur banda’ y cu esfuersonan existente y nan fondonan asocia no ta capaz di stop e deterioro.

Segun DCNA, e organisacionnan di maneho di naturalesa tin falta di fondo severo y por no sobrevivi e crisis di Covid-19.

“Tur organisacion di maneho di area protegi den Hulanda Caribense a mira tanto un caida significante den entrada pa motibo di desaparicion di usuario, pero tambe pa motibo di e falta di consideracion di gobiernonan local, nacional y di reino pa fondonan structural pa ehecucion di e trabao critico di conservacion. Esaki a resulta den e posibilidad real cu organisacionnan di maneho di areanan protegi mester reduci of stop operacion”, DCNA a bisa.

Tin necesidad pa un esfuerso coordina, na nivel di reino, pa conservacion di naturalesa den Hulanda Caribense, segun DCNA a bisa, agregando cu e region aki ta e ‘hotspot di biodiversidad di e reino’.

E memo ta urgi gobiernonan pa duna sosten financiero structural na e organisacionnan pa asina nan por ‘continua nan trabao vital di salvaguardia naturalesa den Hulanda Caribense’.

DCNA ta spera cu e discusionnan tocante pakete di sosten di likides y ayudo financiero na e islanan tambe lo inclui fondonan pa organisacionnan di maneho di naturalesa.

“Proteccion, maneho y conservacion di e recursonan natural di vital importancia den Hulanda Caribense lo ta critico pa repara economianan daña despues di e pandemia di Covid-19”, DCNA a bisa.