Otro aña AZV ta presenta un concepto nobo pa haya trankilidad financiero den futuro

Pa 2023, AZV tin cu tuma accionnan solido unda nan ta bay presenta un otro forma cu nan ta kere cu Aruba lo por maneha nan gastonan den futuro e cual nan ta yama “Cuadronan financiero Multianual”.

Edwin Jacobs a menciona cu esaki ta bay indica kico ta e maximo di gastonan cu nan ta bay permiti den e proximo 5 aña, cu pa 2027 nan por gasta solamente 560 miyon florin. Esey tin cu crea un claridad y un trankilidad tanto pa AZV como pa esun cu tin cu maneha e fondonan, esunnan den sector di cuido cu tin cu planea e forma di sigui duna e servicio y pa instancianan cu ta supervisa.

Nan a presenta e concepto aki cu tambe lo trece trankilidad pa e relacion cu Hulanda, mirando e reto di 60 miyon di florin cu mester corta den cuido y Jacobs a sigura cu esey ta algo insostenibel.

Pero nan a pensa riba otro accion cu por yuda unda nan a present’e caba na Gobierno di Aruba y CAft, y esaki a wordo ricibi cu bon wowo, segun Jacobs a bisa.

Aworaki nan a haya e tarea for di gobierno pa elabora e concepto aki, con ta bay traha cune pa por implement’e mara na e Cuadro Financiero Multianual, cual ta un vision di kico lo pasa cu cuido medico na Aruba den e proximo añanan, debi cu eynan por haya un idea di kico e demanda di cuido medico lo bay ta den proximo añanan pa traduci esey den placa.

“Malesanan cronico y diabetes ta tendencia aworaki y si nos sa cu di aki pa 2030 stoel di dialyse ta bira e dobel di loke nos tin awor cu ta 250, nos sa caba y nos ta prepar’e den e cuadro multianual den e parti di crecemento di gasto y e parti ey ta bay pa inverti den stoel pa dialyse, por ehemplo.”

E pashentnan aki cu dialyse of pashentnan cu no ta sigui tratamento ta keda un reto grandi unda Jacobs a señala cu “nos no por ta polis of meneer di scol pa tur pashent, esun cu no kier carga cu su responsabilidad, lamentablemente nos tin cu carg’e cu tur consecuencia pe, pasobra nos tampoco ta bay laga ni un hende na caya”, el a sigura.

Nan a cuminsa caba pa loke ta trata e proyeccion di e demanda di cuido den futuro pa nan por aloca e ora na dje pa e parti financiero.

Pa 2023 nan ta keda cu e tarea di 60 miyon florin unda nan ta bay wak atrobe con nan ta bay yega na dje “pero mi tin e confiansa cu nos por presenta den e di tres kwartaal di aña un prome version di e concepto con por implementa e pensamento di Cuadro Financiero Multianual pa nan por trahe for di 2024 pa 2030” Jacobs a declara.