Otro siman lo cuminsa saca plasma pa yuda pashent cu Covid-19 Dr. Choudhry: “Nos ta bay triunfa contra Covid-19”

Internista-Nefrologo, Dr. Zaheeb Choudhry ta trece luz di speransa localmente pa yuda e pashent victima di Coronavirus/Covid-19, hunto cu otro esfuerso cu ta wordo haci internacionalmente.

Diaranson anochi, Dr. Choudhry a haci un presentacion riba e investigacion cu e ta bin realisando den Horacio Oduber Hospital (HOH) pa haci uzo plasma di pashent cu a recupera di e Covid-19 pa uza nan anticurpa cu otro pashentnan cu nan bida ta bringando contra e virus aki.

El anuncia cu entrante otro siman nan lo cuminsa saca plasma. Nan tin caba suficiente donante. E ta positivo cu e tratamento cu e plasma por ta efectivo. Ya cu China, Merca y Hulanda tin caso cu efectonan masha positivo cu a yuda e pashentnan di Covid-19 recupera. E tin speransa cu esaki lo por sosode na Aruba tambe.

Ya caba hospital tin tres aña conhuntamente cu Bloedbank, uzando plasma pa otro malesanan. Y awor nan ta spera cu e uzo di plama pa Covid-19 por bira exitoso. Ainda e ta un investigacion caminda mester determina si e ta efectivo of no.

El a bisa cu e uzo di plama pa mehora e pashentnan no ta un idea nobo, ya cu den otro tipo di virus wordo a uza e plasma caba, y e ta bira factibel y efectivo. Pero awor nan mester wak si e ta efectivo pa Covid-19. Pues Aruba ta prominente cu e tipo di investigacion aki hunto cu Merca, Hulanda, Belgica y China.

Despues cu Dr.Choudhry a duna un splicacion breve pa medio di un presentacion riba e comportacion di e Covid-19, ora cu ta afecta curpa di ser humano, causando complicacion cerca cierto pashentnan di risico halto. Esaki debi na su edad of pashentnan cronico cu ta ocasiona cu nan mester wordo interna den hospital. El a bisa cu hospital mester di un sorto di remedi ora cu e pashent ta interna den ICU.

El a bisa cu aworaki e situacion aki ta basta dificil pa nan den hospital. Pasobra actualmente nos no tin un remedi pa e Covid-19, y tampoco un vacuna, y te ainda nada ta efectivo. Pero e tin speransa cu danki na e uzo di plasma ‘awor nos ta bay triunfa contra Covid-19’. Igualmente informacion internacional ta indica cu Israel a desaroya un anticurpa cu ta neutralisa e Covid-19. E ta un remedi cu Instituto Israeli di Medicina Biologico ta bin trahando riba dje.