Otro siman entre dia 9 di Mei pa 13 di Mei 2016, Scol pa Polis ta habri oportunidad pa por solicita pa e funcion di ‘Medewerker Veiligheidszorg’ riba nivel 2. E ‘Medewerker Veiligheidszorg’ lo caba su estudio den e rango di “Agent van Politie” y ta traha mas tanto den e areanan turistico na Aruba.
E rekisitonan ta encera cu e solicitante mester tin minimo di 17 aña y 6 luna pero no mas cu 34 aña di edad, mester ta dispone di un paspoort Hulandes, mester tin un haltura minimo di 1.60 meter, mester dispone di un diploma minimal di EPB uitstroom.
E curso completo tin un duracion di mas o menos 1 aña di tempo, den cual e “agent in opleiding” lo studia 6 luna pa e parti teoretico y lo traha 6 luna pa siña e parti di practica. Despues di e proceso aki ainda por sigui studia y asina integra completo den Cuerpo Policial Aruba pa por sigui crece den rango y den responsabilidad.
Tur esunnan interesa den e funcion aki por haya formulario pa aplica y asina drenta e proceso di seleccion. Por pasa libremente na Scol pa Polis entre 8:00am y 4:00pm di dialuna pa diabierna. Si kier inscribi di biaha, mester tin cu Bo un copia di bo paspoort, copia di diploma y dos potret recien saca na color.
E proceso di seleccion lo tuma mas o menos 6 luna di tempo. Ta premira cu e opleiding pa bira ‘Medewerker Veiligheidszorg’ lo start na Januari 2017. Pa mas informacion yama 5848282 of manda email pa: adminpoi@kparuba.com.
Fuente: comunicado KPA
