Ayera diahuebs presidente Ivan Duque a anuncia cu desde 23 di maart, ta keda suspendi pa 30 dia e entrada di tur vuelo internacional di pasaheronan na Colombia.

El a manifesta cu a tuma e medida pa via di circunstancianan y pa comportamento di algun ciudadano Colombiano cu a yega na e pais y a viola aislamento preventivo pa biaheronan internacional.

“Pa un periodo di 30 dia nos lo limita e entrada y nos ta haci esaki pa via cu nos mester tin mayor control den nos sociedad. Nos mester di colaboracion di tur”, e mandatario a bisa.

E Hefe di Estado a agrega cu tampoco lo permiti pasaheronan di transito na Colombia durante e periodo aki. Fin di siman lo permiti e entrada pa Colombianonan cu ta na otro paisn y lo reforsa medidanan pa verifica cu e biaheronan ta cumpli cu aislamento preventivo.

Presidente Duque tambe a respalda e simulacion di aislamento cu alcalde di Bogota, Claudia Lopez tin programa. Pero a aclaria cu mester haci algun ahustacion den e tema di restriccion programa.

El a expresa cu e accion cu e tratamento di e pandemia ta exigi no ta duna espacio na pelea ni vanidad, y cu den transcurso di dia lo reuni cu Lopez y su funcionarionan pa coordina actividad den capital di e pais.

Di loke ta trata e toque de queda na cada ciudad, Duque a sigura cu e medidanan cu e teritorionan lo tuma mester ta coordina cu Presidencia y a haci un yamada pa unidad nacional.

E mandatario a defende e pakete di medidanan economico y social cu su Gobierno a haci pa enfrenta e crisis, el a afirma cu tabata oportuno y den tempo necesario.