Pa Emile Tromp, musica a bira tanto un escape como un proposito

Recientemente, Bon Dia Aruba a combersa cu Emile Tromp, un hoben di 17 aña di edad kende a conta e storia di con musica a yud’e surpasa dificultadnan den su bida, y alabes a bira su meta y proposito.

“Tur cos a cuminsa cu mi wela,” Emile ta conta. E tabata hopi pega cu su wela, kende tabata biba na cas cu nan. Na 2018, tempo cu Emile tabatin 14 aña di edad y tabata atendiendo scol MAVO, su wela a fayece. “El a dal mi duro,” Emile a bisa, pero asina mes e no a procesa e fayecimento di su wela di biaha. “El a cuminsa dal mi tiki tiki, mi a keda sintie despues.” E siguiente aña durante gymles, un mucha a insulta wela di Emile, y esaki a resulta den un bringamento, te cu e maestronan a separa e dos mucha homber. Sinembargo, ora e yega pa splica e hoofd di e scol kico a sucede, e otro persona “a haci comosifuera su wela tambe a fayece. Mi a rabia asina hopi cu mi no por a papia.” Asina tur dos a haya castigo. Esaki a cuminsa manda Emile den un spiraal di tristesa y falta di comprension di esnan rond di dje.

Na un cierto momento, “un mucha a pone un piano den hal pa si muchanan sinti gana of algo,” y asina Emile a acerca e piano y a descubri cu tur loke e no por a expresa cu su palabra, e por a expresa cu musica. “Mi a cuminsa expresa mi mes cu musica pasobra mas tanto e muchanan rond di mi no tabata worry cu mi,” e ta comenta. “Mi a haya mi mes no ta parti di e grupo… mi a sinti cu musica ta mi grupo.”
Emile a cuminsa siña su mes con pa toca piano online, door di wak video riba YouTube, y den tres pa cuatro luna, a logra domina e instrumento asina bon cu hasta otro muchanan a cuminsa pidie pa duna nan les.

E hecho cu e tabata pasa tur su tempo ta toca piano a cuminsa hala atencion entre e muchanan na scol, y hasta a hala atencion di un mucha muhe kende a acerca Emile y confesa su sentimento. Nan a cuminsa pasa tempo cu otro, pero na final e mucha muhe a kibra cune dilanti henter e scol. “Mi a haya sa cu e tabata djis kier a kibra mi curason pa wak con mi ta actua.” Emile a bolbe busca refugio den su piano, pero mientras tanto, e mucha muhe a cuminsa plama rumornan contra dje na scol. Y a pesar cu e scol mes a investiga y haya cu e rumornan tabata sin base, e otro muchanan si a cambia nan actitud contra Emile.
Asina su desconexion cu esnan rond di dje a profundisa. Y esaki a pon’e bay hinca su mes mas y mas den piano y musica clasico. El a haya cu musica clasico ta resona cune y su sentimentonan, cu ta e estilo cu ta echt lag’e expresa su mes, ya cu e musica sin letra ta expresa lo mas profundo, loke palabra no por expresa.

Pero su puntonan na scol a bay hopi atras.

Na 2020 cu yegada di Covid, Emile a keda confronta problema na scol door di no “fit in.” Tampoco a permitie toca piano den hal mas pasobra “mi tabata un tiki obsesiona.”

Alabes na cas, su famia tabata confrontando problema economico, cu a resulta cu Emile no por a drumi den su mesun camber pa motibo cu e dak ta lek y a crea schimmel. Pero asina mes, Emile tabata keda toca piano, tin biaha pa ocho ora consecutivo. Musica tabata su refugio.

Su pasion a crece y el a cuminsa haya interes pa compone su mesun cantica, inspira pa su compositornan faborito manera Mozart y Haydn. El a studia con nan ta skirbi y asina el a sigui crece. Na mes momento, su maestronan na MAVO a conseh’e pa no continua cu MAVO sino inscribi na EPB. “Mas tanto a pensa cu loke ami kier bira, no ta posible na MAVO,” Emile ta conta. “Pero si mi a bay 3de MAVO y mi bay 4de, mi por a bay den exterior caba, mi lo por a bay conservatorio.” Pero el a confia su maestro y a stap over pa EPB.

Aki atrobe su mal suerte cu educacion a continua. Emile ta conta cu el a purba di registra pa segundo klas, prome nivel; pero no a lag’e haci esaki y e mester a cuminsa na prome klas, loke a demotiv’e mas ainda. Ora el a bay over pa tweede, e kier a bay den kind en jeugd, pero no tabatin lugar p’e den klas y a mand’e den horeca, unda el a bolbe haya mal experiencia y decepcion, cu maestro cu no ta mustra interes ni comprension pa su situacion personal. “Eynan mi motivacion a caba.” El a djis schrijf uit.

El a cuminsa cay den depresion y hasta considera suicidio. El a cuminsa bay na e psicologo di scol, y el a haya ayudo tambe di fundacionnan y voogdijraad. E ta sinti cu esaki a yuda hopi. “Mi ta miho cu antes. Mi autoestima a crece, mi a cuminsa sinti normal, con mi tabata antes cu e fayecimento di mi wela,” e ta conta.

Y mientras cu “scol tabata un struggle, musica tabata un escape.” El a upload su prome musica riba YouTube cu a haya un acogida modesto. El a haya otro website unda por a upload su composicionnan y ricibi feedback di otro compositornan. Y asina el a keda desaroya mas como musico. E tabata practica na Cas di Cultura pa mehora su tecnica, y aki diferente hende a nota su talento. “Tabatin un evento cu Conseho di Minister. Mi tabata toca, y sorpresa ta cu Prome Minister a bin banda di mi y TeleAruba tabat’ey y nan a grab’e ta scucha mi.” Igualmente el a haya bon feedback di minister di Cultura, Xiomara Maduro. Y e aña aki, tempo cu Famia Real Hulandes a bishita Aruba, Emile a logra entrega dos composicion cu el a haci specialmente pa prinses Amalia.

December ultimo, danki na Scol di Musica Rufo Wever, el a haya oportunidad pa toca den nan concierto di Pasco. El a scoge pa toca un seccion di opera di Mozart. Esaki a mustr’e cu musica ta su proposito. “Mi ta patras di escenario y mi ta wak cu henter sala ta preta yen. Nan a presenta mi dilanti tur hende, ‘esaki ta pianista Emile Tromp.’ Mi a cuminsa toca, y tur hende a keda den ful silencio. Mi tabata echt nervioso pero ora mi a cuminsa toca, universo a djis disparce.” E no a haci ningun eror. Ora el a caba tur hende a keda sorprendi, hasta Emile, sorprendi pa e aplauso enorme cu el a ricibi. “E sentimento di nervio cu despues ta disparce a laga mi sa cu mi ta echt pas pa esey.”

Maestro Carlos Bislip di e Scol di Musica Rufo Wever a acerca Emile pa yud’e mehora su tecnica y prepara pa drenta un academia of conservatorio den exterior, pa asina haci musica su profesion.

Tambe na cas su situacion a cuminsa mehora y e ta bisa cu e ta cuminsa mira cu solo ta sali den horizonte. Actualmente Emile no ta atendiendo ningun scol, pero e ta preparando pa cuminsa avond MAVO e siguiente semester, “awo cu motivacion.”
“Mi ta buscando pa haya e balans entre musica y scol,” Emile ta bisa. Y mientras tanto, e ta keda enfoca riba su musica, cu ayudo di mentornan. Apart di Carlos Bislip y Edjean Semeleer, e ta hayando ayudo di Chris Cross, kende ta bay yud’e cu tecnica y e banda di negoshi di musica, “pa haya un trabao, pa up mi mentalidad,” e ta conta.

Y finalmente Emile ta sinti cu su futuro ta briyante. “El a cuminsa scur, pero awo ta briyante.”