Un grupo di ciudadano kier hiba un sonrisa mañan 24 di december cu ta bispo di Pasco y p’esey nan ta buscando donacion di personanan cu por duna nan co’i hunga den bon estado y paña pa muchanan y personanan mas vulnerabel den comunidad.
Na Aruba tin hopi mucha y famia cu no tin suficiente recurso pa por haya un regalo di Pasco, pa e motibo aki Vicente Cristofori hunto cu tres persona mas a dicidi di haci esaki pa prome biaha mañan 24 di december ta bay na Imeldahof 11or di mainta hunto cu Santa Claus pa asina hiba na e muchanan algun regalo y paña den bon estado.
Den oranan di atardi tambe nan ta bay na casnan di pueblo ubica na Noord unda hunto cu Santa Claus den un pickup nan lo hiba mas regalo y paña pa e famianan cu ta biba den area aki.
E deseo di nan ta pa hiba un presente na e muchanan di menos recurso y paña cu nan a haya di donacion cu lo wordo clasifica den diferente size, pero igualmente, nan ta den buskeda di mas hende cu por colabora cu e causa aki pa asina e muchanan por bira contento cu un presente.
“Importante ta pa hiba algo na nan, no ta importa si e ta costa un tiki, e muchanan lo ta contento di haya algo e dia aki cu ta importante pa nos tur, pa nan tene un sonrisa den Pasco”, Cristofori a señala.
Pa personanan interesa di colabora cu e nobel causa aki, por comunica na e number di telefon 568.6342 di Vicente Cristofori e cual ta e persona encarga di organisa e actividad aki, tambe el a sigura cu si e persona kier duna paña of coy hunga pero no tin transporte, igualmente por yama na e number ey y nan ta pasa busca e donacion.
