Pa 18 aña caba Imelda Geerman-Willems ta trece alegria pa e muchanan di Aruba cu su popchinan di caricaturanan y den e añanan mas recien cu shownan magnifico pa muchanan. Den un entrevista pa Bon Dia Aruba Imelda ta conta con el a yega na dedica na ahci muchanan contento.

Imelda ta un ambtenaar pa 30 aña. E ta conta cu e ta bin di un famia di 8 ruman, 5 muhe y 3 homber, y e yiu mas chikito. E tin 22 aña casa cu Patrick Geerman y nan tin un yiu homber di 19 aña. Mama y tata a lanta nos cu norma y balor.

Imelda a traha pa 8 aña y mei cu Party Animals, pero despues cu su mama a fayece el a stop di anima fiesta di mucha. Mi mama a feyece prome locual a laga un buraco masha grandi den mi curason. Mi tata a fayece despues cual tambe a laga un bashi”, el a expresa.

El a sigui conta cu despues di algun luna cu el a stop di anima fiesta el a cuminsa sinti falta di haci muchanan felis. Contando su casa con e tabata sinti, su casa cuminsa prepara un sorpresa pe sin bise nada.

“Ora cu materialnan a a cuminsa yega el a surprise mi cu un KvK. y riba dje e nomber di EZ Party Solutions. EZ Party Solutions tin 18 aña di existencia caba y e tabata un regalo super grandi pa mi, caminda mi por a cuminsa haci muchanan felis atrobe”, el a conta.

E prome show di EZ Party Solutions tabata cu Tio George y Tanchi Esmee. Imelda a splica cu pa e tempo ey e nunca bay Disney y e tabata pensa riba e gana di yega Disney un dia, locual a a dune idea pa haci e muchanan di Aruba cu no por bay Disney feliz door di cuminsa cu costume.

E prome costume cu a yega Aruba tabata di Hello Kitty pa un fiesta di un amiga di Imelda. Despues nan a topa cu un grupo preparando show pa reina di carnaval cual tema tabata Sesame Street y di biaha Imelda y su casa a bisa nan ta yuda treciendo e costumenan pa e show, cual a sali best show.

Despues di traha dos show cu Tio George y Tanchi Esmee, Imelda a sigui conta, el a tuma e durf di haci un show riba su mes cual tabata ‘Masha and the Bear’. E show a bende seis sala completo prome cu e show a cuminsa.

E aña aki Imelda a organisa e show titula ‘Encanto and Friends’. El a splica cu ora el a wak e pelicula Encanto di biaha el a bin cu e idea pa un show di Encanto, hunto cu e tan gusta caracter di Sonic. Despues di e show y cuater sala completo, Ez Party solutions hunto cu e grupo di baile Kids & Youth in Action a ricibi invitacion pa haci e show na Corsow.

“Esaki tabata mi soño hecho realidad. Danki na e crew di EZ y mi famia y sin laga afo e promotor Corine. Nos a sa di representa Aruba y a laga un bunita stempel. Nos a presenta un solo show pa un sala di 1500 persona, un sala sold out. Di momento cu e prome cancion a cuminsa, e alergia cu e muchanan tabatin riba nan cara a pone nos sinti nos na cas y tur nervio a keda atras. E tabata un experiencia super bunita. Hopi trabou pero pa muchanan nunca e curpa ta cansa. Un danki sigur na Juf Debra pa a join mi den mi show”, el a expresa.

Pa loke ta 2023, Imelda ta sigura cu tin un super show na caminda, pero no por papia mucho ainda paso awor nan ta trahando riba dje.

Por ultimo Imelda gradici tur cu ta yude haci e muchanan di Aruba contento. “Un biaha mas mi ta gradici mi gran Dios cu a dunami energia pa haci muchanan felis, na mi famia pa tur e pasenshi y na mi super crew cu ta all out cu nos pa make things happen”.