E tardansa den otorgamento di permiso cu DIMAS ta procesa, no tin di haci cu Hulanda a pidi pa wanta nan un rato, den cuadro di e reforma riba tereno di husticia cu nan a pone den e landspakket.
Minister di Husticia, Andin Bikker a laga sa cu DIMAS mescos cu otro servicio di gobierno, tabatin su retonan debi na e situacion sin precedente di coronavirus. Esaki a haci cu nan mester bay over riba digitalisacion di solicitud y procesamento di permiso cu a trece su propio reto cune. Te ayera DIMAS a cuminsa ricibi clientenan via cita online bao stricto medida di higiena y distanciamento social, despues cu nan a permanece cera pa publico, durante varios luna pa motibo di Covid.
Pero si el a laga sa cu lo bin cu un otro reto hunto cu e crisis aki. Esta cu nos mercado laboral a bira completamente diferente. Nos ley di admision y expulsion (LTU) ta mara a base di articulo 7 cu ta cita cu continuamente un persona cu ta aplica pa un permiso ta wordo haci un analisis pa medio di departamento di Labor. E analisis ta determina si e cupo di trabao cu ta wordo pidi ainda ta disponibel. Kiermen si e no por wordo yena cu trahado localmente disponibel p’e.
Segun e mandatario nos tin un averahe grandi di persona cu ta hayando subsidio di salario, y otro cantidad cu a perde trabao cu ta hayando FASE como sosten economico di parti di gobierno. Esaki a pone cu e posibilidad di aumento di desempleo ta uno eminente. Nan a bay den un proceso di consulta cu diferente departamento cu a trece nan conseho. A base di e consehonan aki lo bin cu un maneho nobo den DIMAS, entrante 1 di augustus venidero.
Aspecto humanitario
Encuanto e situacion actual di cantidad di persona cu a aplica pa un permiso y ta confronta tardansa pa haya contesta, mientras cu nan no por haci uzo di nan seguro general AZV debi cu nan permiso a caduca, aspecto humanitario a wordo teni na cuenta.
Bikker a keda di anuncia awe algun contacto of telefon via DIMAS pa asina e persona cu ta den un incertidumbre, sin seguro di AZV pa motibo cu ainda su permiso ta den proceso, por tuma contacto cu nan. Segun e mandatario nan ta analisando e situacion aki caso pa caso, ya cu den caso di admision cada caso ta uno particular y dificilmente nan por generalisa.
Den e cuadro aki a percura cu persona cu ta trece algun preocupacion dilanti, por ehempel si nan ta na espera di un baby of si nan ta sufriendo di un malesa cronico, cu DIMAS por atende cu urgencia nan peticion di permiso pa wak si nan por bin na remarca.
Siman pasa e mandatario a duna instruccion pa un comision pa nan ta mas accesibel pa atende e casonan particular aki. E mesun comision aki nan a yega di trece dilanti dos aña pasa a base di ley di LTU pa salvaguardia y optimalisa e proteccion legal.
E comision lo ta disponibel pa atende caso por ehempel di persona cu a perde proteccion di AZV. E ta haci un apelacion cu si tin persona den un situacion asina, ya cu aspecto humanitario ta wordo teni na cuenta, dor di e problema di Covid y tardansa di procesamento di permiso.
